Numrat e personave të prekur me Covid në vendin tonë janë çdo ditë në rënie.
Zëvendës ministrja e Shëndetësisë, Mira Rakacolli në një lidhje të drejtpërdrejtë për Ora Neës u shpreh se nuk mund të themi që e kemi superuar luftën me virusin, pasi kemi ende raste aktive, por nuk priten më valë të mëdha si ato që kemi përjetuar.
Rakacolli: “Do doja të thoja që e kemi fituar luftën, por fatkeqësisht nuk e themi dot, luftën nuk e kemi superuar. Ne vërtet qëndrojmë në një situatë të qëndrueshme, megjithëse ditët e fundit kemi një rritje të lehtë të rasteve ditore. Kjo nuk është shqetësuese, por është një sinjal që virusin e kemi të pranishëm. Nuk mund të themi që tashmë e kemi kaluar rrezikun, por nuk priten valë të mëdha që i kemi përjetuar.”
Përsa i përket vaksinimit, zonja Rakacolli tha se personat që vaksinohen nuk kanë mundësi për të zgjedhur se cilën vaksinë do të bëjnë.
Rakacolli: “Mundësi për zgjedhje të vaksinës nuk mund të ketë sepse sidomos kur bëhet vaksinimi me njësi të lëvizshme, aty vihet me një numër të caktuar dhe vaksina të cilat i kemi në përdorim. Ne nuk i kemi të gjitha llojet e vaksinave për të gjithë numrin e popullsisë. Efikasiteti i 4 llojeve të vaksinave që ne kemi në qarkullim është i provuar që është mjaft i lartë.”
E pyetur nëse varianti Delta i virusit është i pranishëm në Shqipëri, Racacolli u shpreh se ka dyshime të forta, por ende nuk është konfirmuar asnjë rast.
Rakacolli: “Ka dyshime të forta që virusi Delta është i pranishëm në Shqipëri. Ne po presim një konfirmim nga laboratorët e referencës që kemi në Gjermani. Përsa i përket mbrojtjes së variantit Delta të vaksinave duhet të presim edhe pak duke qenë se është një variant i ri, pro studimet laboratorike tregojnë që janë efikase.”
Rakacolli tha se nuk mund ta dallojmë nëse jemi të infektuar me variantin Delta pa shkuar te mjeku, sepse shenjat janë pothuajse njësoj edhe me variantet e tjera të virusit.
Rakacolli: “Dyshimet ngrihen jo thjesht nga shenjat, sepse shenjat janë pak a shumë njësoj, pra mbizotëron shenja e infeksionit të rrugëve të sipërme respiratore. Ka pasur çrregullime post vaksinimit, por ne jemi shumë vigjilentë për këtë punë. Ne kemi të ngritur Komitetin për vlerësimin e efekteve anësore të vaksinave qëkur filloi fushata e vaksinimit. Efekte anësore ka pasur, por jo efekte të rënda si raste e trumbozës apo paralizës.”
