Mediat në Gjirin Persik i kanë bërë jehonë intervistës së Sekretarit të Përgjithshëm të Partisë Socialiste, Taulant Balla dhënë një ditë më parë për Agjencinë e Lajmeve të Emirateve të Bashkuara Arabe (Emirates News Agency).
Balla në intervistë theksoi se Emiratet e Bashkuara Arabe janë një fanar i paqes dhe tolerancës në rajon, duke shprehur vlerësimin e tij për Emiratet e Bashkuara Arabe dhe udhëheqjen e saj të mençur për ofrimin e mbështetjes së vazhdueshme për Shqipërinë.
Ndër të tjera, Balla tha se marrëdhëniet mes dy vendeve vazhdojnë të rriten në shumë fusha me mbështetjen e udhëheqjeve të tyre, duke shtuar se të dy vendet vazhdimisht përpiqen të forcojnë bashkëpunimin, veçanërisht në fushat ekonomike.
“Ne nuk do të harrojmë qëndrimet fisnike të Emirateve të Bashkuara Arabe ndaj Shqipërisë dhe popullit të saj. Kur tërmeti 2019 goditi vendin tonë, Emiratet e Bashkuara Arabe ishin ndër vendet e para që na ndihmuan të rindërtojmë rreth 2,000 shtëpi. Emiratet e Bashkuara Arabe ndihmuan gjithashtu në rinovimin e Aeroportit Zayed“, shtoi ai.
Balla shpjegoi se Emiratet e Bashkuara Arabe janë ndër promovuesit kryesorë të paqes, tolerancës, bashkëjetesës dhe stabilitetit në rajon, një rol që Shqipëria luan në mënyrë të ngjashme në rajonin e Ballkanit.
Ai tha se “Expo 2020 Dubai, e cila do të fillojë në Emiratet e Bashkuara Arabe në tetor, 2021, do të jetë ngjarja më e madhe, më e rëndësishme globale që do të zhvillohet gjatë këtij viti”.
“Përmes pjesëmarrjes sonë në këtë ekspozitë globale, ne do të nxjerrim në pah mundësitë për investime në Shqipëri, duke tërhequr atraksionet turistike” vazhdoi Balla, duke shtuar se Expo 2020 Dubai është një platformë monumentale globale që shërben për të forcuar bashkëpunimin dhe partneritetin midis kombeve të botës.
Ai vuri në dukje se, Shqipëria lejon hyrjen e shtetasve dhe rezidentëve të Emirateve të Bashkuara Arabe pa nevojën e një vizë hyrëse, me dy fluturime ditore që operojnë nga Dubai dhe Sharjah dhe shprehu shpresat për të parë Wizz Air Abu Dhabi, duke filluar fluturime të përditshme nga Abu Dhabi në Tiranë për të rritur turizmin dhe shkëmbimet tregtare midis dy vendeve.
Vendndodhja strategjike e Shqipërisë në Ballkan, sipas tij, “e bën atë një nga destinacionet turistike më premtuese për shkak të historisë të pasur dhe peizazheve të bukura natyrore, shpjegoi ai më tej”.
Balla tha se ka shumë mundësi investimi në Shqipëri, ndërsa ftoi investitorët nga Emiratet e Bashkuara Arabe të investojnë në sektorë të ndryshëm të Shqipërisë, duke përfshirë turizmin, pasuritë e patundshme dhe energjinë e pastër.
“Shpresojmë të bashkëpunojmë me Masdar, pasi është një nga kompanitë e energjisë së rinovueshme më të spikatura në botë. Ka shumë rrugë bashkëpunimi për të eksploruar midis vendeve tona, dhe ‘Expo 2020 Dubai’ do të na sigurojë mundësinë për të ndjekur partneritete të tilla, jo vetëm me investitorë të Emirateve, por edhe investitorë nga e gjithë bota”, shtoi Balla./ATSH/
