Kryeministri i Kosovës, Albin Kurti, ka thënë se Qeveria që ai udhëheq do të jetë pranë artistëve kosovar dhe do t’i përkrah ata si asnjëherë më parë. Kurti këto komenti i bëri pas vizitës dyditore në Francë, ku mori pjesë në Festivalin e Cannes.
Tutje, kryeministri i Kosovës thotë se Kosova është bërë forcë ndërkombëtare në kinematografi, duke përmendur dy filmat nga Kosova që garuan në këtë Festival.
‘’Kosova është bërë forcë ndërkombëtare në kinematografi. Nuk e takuam asnjë personalitet arti e kulture që nuk dinte për Kosovën. Samir Karahoda dhe Luàna Bajrami ishin krah për krah në Cannes me artistët më të shquar që erdhën këtu prej anekënd globit. Nga shumë mijëra filma ky Festival përzgjodhi rreth një dyzinë sosh për secilën kategori. Shumica dërrmuese e vendeve të botës nuk u kualifikuan. E Kosova kishte dy filma që u shfaqën dhe garuan. Rëndësia e artit dhe vlerat tona po bëhen bashkë për vetëdijen dhe shqisat e miliona shikuesve të huaj dhe mijëra artistëve të famshëm. Qeveria që e udhëheq do të jetë pranë artistëve tanë dhe do t’i përkrah ata si asnjëherë më parë. Qeveria që e udhëheq do të jetë pranë artistëve tanë dhe do t’i përkrah ata si asnjëherë më parë’’, ka shkruar Kurti në Facebook.
Kurti ndër të tjera bëri të ditur të gjitha takimet që pati në këtë vizitë dyditore, përfshirë edhe ministren e Kulturës në Francë, Roselyne Bachelot.
‘’Në kuadër të vizitës dyditore në Cannes takova Jerome Paillard, drejtorin e Marche dú Film të Cannees, tregut më të madh të filmit në botë; Stefan Laudyn, Drejtorin e Festivalit Ndërkombëtar të Varshavës; Nikolaj Nikitin, drejtorin e SOFA – shkolla për avancimin e filmit; Katriel Schorry, nga Fondi i Filmit të Izraelit, dhe Helge Albers, nga Fondi i Filmit të Hamburgut. I falënderova për mbështetjen e filmit dhe artistëve nga Kosova si dhe diskutuam për mundësitë e shtimit të bashkëpunimit. Po ashtu takova edhe Ministren Franceze të Kulturës, znj. Roselyne Bachelot, me të cilën biseduam për avansimin e prodhimit të përbashkët të filmave, si dhe kryebashkiakun e Cannes, z. David Lisnard. E në fund, ishte kënaqësi të takoj Kryetarin e Jurisë sivjet, regjisorin Spike Lee, si dhe regjisorin italian Paolo Sorentino’’, njoftoi Kurti.
Vizita e të parit të ekzekutivit në Francë dhe ajo ditë më herët në Greqi kanë qenë cak i sulmeve nga opozita ditëve të fundit.
Kurti të hënën do të jetë në Bruksel ku do të takohet me presidentin e Serbisë, Aleksandar Vuçiq, për të diskutuar rreth disa çështjeve për dialogun Prishtinë – Beograd.
