Presidenti i Republikës Ilir Meta ka risjell në vëmendje Ditën Ndërkombëtare të Nelson Mandelës.
Nëpërmjet një postimi në Facebook, kreu i shtetit shkruan se Mandela ishte një simbol i vuajtjeve në emër dhe mbrojtjes së lirive dhe të drejtat e njeriut.
Zoti Meta përmend emra të njohur personalitetesh shqiptarë që për dekada me radhë u privuan nga liria, vuajtën dhe u përndoqën nga regjime mizore për shkak të ideve dhe besimeve të tyre.
Postimi i plotë:
“Dita Ndërkombëtare e Nelson Mandelës na risjell sot në vëmendje veprën dhe trashëgiminë e vlerave të një personaliteti të madh dhe të paharruar, simbol të vuajtjeve në emër dhe për mbrojtjen e lirive dhe të drejtave të njeriut, i cili frymëzon në çdo kohë me angazhimin dhe përkushtimin e palodhur për paqen dhe pajtimin.
Në Shqipëri dhe në Kosovë ne kemi patur At Zef Pllumin, Pjetër Arbnorin, Adem Demaçin dhe mijëra ‘Mandelat’ tanë, të cilët për dekada me radhë u privuan nga liria, vuajtën dhe u përndoqën nga regjime mizore për shkak të ideve dhe besimeve të tyre, por mbijetuan për të na rrëfyer dhe inkurajuar për të qenë më tolerantë për idetë, besimet dhe kulturat e njëri-tjetrit, si dhe gjithmonë syçelët për mbrojtjen e demokracisë dhe pluralizmit,” shkruan kreu i shtetit në Facebook.”
