Vazhdon të rritet në mënyrë shqetësuese numri i të infektuarve me Koronavirus kur kanë mbetur edhe pak orë nga zhvillimi i ceremonisë hapëse të Olimpiadës “Tokyo 2020”.
Katër banorë të tjerë të Fshatit Olimpik, ndër të cilët dy atletë, rezultuan pozitivë me COVID-19.
Një total prej 91 personash të akredituar për Lojërat e Tokios kanë rezultuar pozitivë që nga fillimi i korrikut. Skateboarderi Candy Jacobs nga Holanda dhe lojtari i pingpongut, Pavel Sirucek nga Republika Çeke janë zbuluar bartës të Koronavirusit.
Atyre iu desh të largoheshin nga fshati për t’u akomoduar në një hotel karantinë. Dy anëtarë të stafit, një kategori që përfshin trajnerë dhe zyrtarë të ekipit që qëndrojnë në Fshat Olimpik me pamje nga gjiri i Tokios, rezultuan gjithashtu pozitivë.
