Presidenti Ilir Meta dekretoi thirrjen e parlamentit të ri, të dalë pas zgjedhjeve të 25 prillit.
Mandati i parlamentit të shkuar përfundon më 9 shtator por Meta nuk shfrytëzoi të gjithë afatin 10 ditor, duke thirrur mbajtjen e mbledhjes së parë të Legjislaturës së 10-të, vetëm një ditë më pas, me 10 shtator.
Por nëse kanë mbetur edhe 9 ditë nga mbledhja e Kuvendit, 5 deputetë të zgjedhur nga votat e 25 prillit kanë dhënë dorëheqjen.
Kalvari i dorëheqjeve do të niste mëngjesin e hershëm të 26 prillit, kur sapo kishte nisur numërimi i votave të 25 prillit. Kryetari i PSD-së, Tom Doshi, në një njoftim surprizë pasi kishte marrë tre mandate deputetësh njoftoi se heq dorë nga mandati i deputetit.
Pas tij Gramoz Ruçi njoftoi mbylljen e ciklit 30-vjeçar në politikë. Ndërkohë pak ditë më parë do të dorëhiqej Najada Çomo dhe Mark Marku i PD për tu përmbyllur sot me dorëheqjen e Lefter Kokës.
26 prill – Në orët e para të mëngjesit të së hënës, teksa numërimi i votave të 25 prillit kishte nisur, thuajse në të gjithë vendin, erdhi një lëvizje e papritur. Tom Doshi, kryetar i PSD dhe kandidat për deputet në zgjedhjet e së dielës, dha dorëheqjen si deputet, por edhe si kandidat fitues në zgjedhjet e 25 prillit. Ai i kërkoi KQZ ta zëvendësojë sipas ligjit. Ai nuk sqaroi arsyet por ambasadorja Yuri Kim disa herë e kishte përmendur emrin e Doshit, si një person të cilit i është ndaluar hyrja në Shtetet e Bashkuara që në vitin 2018 për shkak se është i përfshirë në korrupsion të nivelit të lartë.
12 qershor- Një prej figurave më të rëndësishme, pjesë e Partisë Socialiste që prej krijimit të saj, Gramoz Ruçi, njoftoi në Kongresin e jashtëzakonshëm se kishte hequr dorë nga gjithë funksionet politike në PS, madje edhe nga mandati i deputetit. Nga muaji shtator kur dorëzon edhe detyrën e kryeparlamentarit, ai nuk do të jetë më në kuvend dhe as me funksione në PS.
25 gusht- Mjekja Najada Çomo nuk do të jetë deputete. Kryeministri Rama njoftoi se Çomo i kishte paraqitur dorëheqjen nga mandati i deputetit, duke zgjedhur të qëndrojë në krah të kolegëve të saj, në luftën kundër pandemisë së COVID. Sipas Ramës, Çomo ishte kërkuar të qëndronte pranë ekipit të saj, në një kohë kur varianti Delta po përhapet masivisht në vend. Mandatin e Çomos pritet ta marrë Mimi Kodheli,.
27 gusht- Mark Marku, drejtuesi politik i Qarkut të Lezhës, njoftoi se ka vendosur të mos rikthehet si deputet në Parlament si i zgjedhur i demokratëve në 25 Prill, por po ashtu të japë dorëheqjen dhe si anëtar i Këshillit Kombëtar të selisë blu. Arsyet e këtij vendimi Marku i dha në një shkrim të botuar në të përditshmen “Panorama”, duke analizuar dhe gjendjen ku ndodhet Partia Demokratike pas humbjes në zgjedhje dhe përgjegjësitë ia faturon vetëm Lulzim Bashës. Marku që zgjedh ta ndajë në 4 etapa rënien qe po njeh forca që solli demokracinë, në krye vendos mosreagimin ndaj masakrës elektorale duke ju referuar zgjedhjeve të 25 Prillit, e më pas vetë procesit zgjedhor për zgjedhjet për kryetarin e Partisë Demokratike që e quan një fitore rutinë atë të Lulzim Bashës. Të tretën në radhë vendos Kuvendin Kombëtar të PD, ku sipas Markut u dëshmua se Lulzim Basha nuk është kryetari real i partisë.
1 shtator- Ditën që Presidenti dekretoi 10 shtatorin si ditën e konstituimit të Kuvendit të ri të dalë nga zgjedhjet e 25 prillit, deputeti i Partisë Socialiste Lefter Koka deklaroi se nuk do të jetë pjesë e parlamentit. Lajmin e bëri me dije përmes rrjeteve sociale, ku Koka thekson se është koha për të përmbyllur një cikël. Tashmë KQZ do të marrë në shqyrtim listën e PS-së në Durrës për të vendosur se cilët nga emrat do të jetë në parlament.Mandati i Lefter Kokës ndahet mes Denis Deliut që ka marrë 2848 vota dhe Ana Dhamos, e cila pavarësisht numrit më të vogël të votave preferenciale,mund të përfitojë mandatin për shkak të kriterit gjinor në listën shumëemërore të kandidatëve të PS-së. Koka ka mbajtur detyrën e ministrit të Mjedisit në qeverinë socialiste, ndërsa ka qenë kryetar i PS të Durrësit në vitet 2003 deri në 2007.