Ministrja e Jashtme, Olta Xhaçka në një intervistë për Zërin e Amerikës u shpreh se strehimi i tyre është një proces që mund të shkojë edhe përtej 12 muajve që është parashikuar nga qeveria.
Gjithashtu ministrja tha se kostoja e qëndrimit të afganëve në vendin tonë është e mbuluar nga partnerët.
Zëri i Amerikës: Zonja Xhaçka, si do të mbulohet kostoja e qëndrimit të tyre?
“Patjetër që është një proces që e thamë do të shkojë përtej 12 muajve që do të kërkojë me strehime të ushqimit, shëndetësisë, arsimit, sigurisë e shumë nevojave dhe shërbimeve tjera. Do të kërkonte një kosto të posaçme që ndoshta do të ishte e papërballueshme për buxhetin e Shqipërisë. Kjo është arsye pse partnerët tanë në këto negociata e kanë sugjeruar përballimin e kostove nga ana e tyre.
Dhe për më tepër, kemi mbështetjen e tyre në procesin e aplikimit për marrjen e vizave për të vazhduar drejt Shteteve të Bashkuara të Amerikës. Për momentin, ata janë duke u trajtuar le të themi pak a shumë me të njëjtat kosto që kanë pasur qytetarët shqiptarë pas tërmetit, kur jemi detyruar që t’i strehojmë nëpër strukturat hoteliere të vendit. Në vazhdim, jemi duke hartuar një strategji më afatgjatë për plotësimin e të gjitha nevojave të tyre bashkë me partnerët, institucionet shtetërore që janë të angazhuara në këtë proces dhe organizatat ndërkombëtare me të cilat po bashkëpunojmë”, tha Xhaçka.
Autoritetet shqiptare u shprehën të gatshëm të strehonin deri në 4 mijë persona. Aktualisht, deri më tani, janë 662 afganë të mbërritur në Shqipëri.
