Legjenda e boksit, Manny Pacquiao, ka njoftuar për pensionimin nga sporti për t’u fokusuar në karrierën politike.
Kampioni i shumëfishtë, që është senator në Filipine, ka njoftuar tashmë për synimet që të garojë për president në zgjedhjet e 2022-s.
Meçi i fundit ndaj Yordenis Ugasit muajin e kaluar u mbyll me humbje për 42-vjeçarin, Manny Pacquiao.
“Vetëm dëgjova gongun e fundit. Boksimi mori fund”, ka thënë ai.
Në një video të postuar në rrjetet sociale, Pacquiao e përshkroi pensionimin si “vendimin më të vështirë në jetë”, duke shtuar se boksi ia ka dhënë shansin “të dalë nga varfëria e të ndryshojë shumë jetë”.
Ai po ashtu ka falënderuar fansat, miqtë dhe të gjithë përkrahësit në karrierë. Trajnerin Freddie Roach e ka përshkruar si “familje, vëlla dhe mik”.
