Pasditen e sotme ka nisur protesta e dytë para kryeministrisë. Qytetarët sikurse herën e parë janë mbledhur për të kundërshtuar rritjen e çmimeve.
Edhe sot protesta është thirrur nga rrjetet sociale nga aktivisti Adriatik Lapaj, i cili tha se një sukses të parë e kanë, pasi kryeministri lajmëroi se nuk do të ketë rritje të energjisë elektrike për familjarët dhe bizneset e vogla.
“Kryeministri reflektoi për energjinë elektrike, por kjo nuk mjafton. Sot jemi dhe për çmimin e bukës, ushqimit të shportës, karburanteve, por edhe për të ngritur zërin për meritokraci, për drejtësi sociale dhe për të kërkuar që në këtë vend të marrë fund tranzicioni i stërzgjatur ku ndahen në dy kampe shqiptarët. Çdo qytetar që e ndjen se duhet të protestojë, le ta bëj atë. Misioni që duhet të kemi është që qytetarët të reagojnë për veten e tyre. “ tha Lapaj.
Sot i pranishëm ishte përsëri aktori i humorit Florjan Binaj që u bënte thirrje qytetarëve t’i bashkohen protestës.
“Kemi dalë për të ngritur zërin dhe për ata që nuk kanë mundësi, të gjithë preken, u bëj thirrje të gjithë të rinjve të marrin pjesë sa rrinë merren me klikimet në instagram. Ta bëjnë për vete, për prindërit dhe për të ardhmen”, u shpreh Binaj.
Qytetarët janë mbledhur sot duke sfiduar edhe shiun dhe duke protestuar për kërkesat e tyre.
