Ambasadorja amerikane në Tiranë, Yuri Kim, apeloi qeverinë shqiptare që ta vendosë ndër prioritetet e saj kryesore përmirësimin e klimës së biznesit.
Kim: I bëjmë thirrje qeverisë shqiptare që ti japë përparësi përmirësimit të klimës së biznesit për të zhbllokuar me të vërtetë potencialin që të gjithë e dimë që ekziston këtu.
Ajo tha se reforma në drejtësi duhet çuar deri në fund në mënyrë që gjykatat të jenë të pastra.
Kim: Të drejtat e pronës duhet të trajtohen njëherë e mirë sa më shpejt të jetë e mundur dhe konkurrenca e ndershme duhet të jetë parësore në mënyrë që të gjithë investitorët, të mëdhenj apo të vegjël, shqiptarë apo të huaj, të luajnë me të njëjtat rregulla të drejta dhe transparente.
Deklaratat Ambasadorja i bëri në Asamblenë e Përgjithshme të Dhomës Amerikane të Tregtisë mbi zgjedhjet për Bordin drejtues.
Kim tha se qeveria shqiptare duhet ta marrë seriozisht agjendën e investime të Dhomës Amerikane të publikuar së fundi dhe ta shohë si udhërrëfyes për të përmirësuar klimën e biznesit.
Kim: Jam e kënaqur që kryeministri e ka parë këtë si një mënyrë për të përmirësuar klimën e biznesit. Një klimë më e mirë buiznesi do të krijonte një Shqipëri më të mirë dhe më të fortë. Gjatë 30 viteve të fundit kemi bërë rrugë të gjatë por kur shohim atë që kemi arritur deri më tani kam besim se e ardhmja do të jetë edhe më e ndritur dhe presim me kënaqësi që të punojmë me Dhomën Amerikane për ti zhvilluar të gjitha këto./Ora News/
