Gjatë qëndrimit në Itali, presidenti Ilir Meta ka zhvilluar edhe vizitën e tij të parë në Palermo ku është pritur nga Presidenti i Asamblesë Rajonale të Siçilisë, Gianfranco Miccichè.
“Shumë i lumtur të vizitoj për herë të parë Palermon, ku pata kënaqësinë e veçantë të mikpritesha nga Presidenti i Asamblesë Rajonale të Siçilisë, z.Gianfranco Miccichè, në Pallatin Mbretëror” shkruan Meta në facebook.
Gjatë bisedës me Miccichè, kreu i Shtetit shqiptar ka theksuar nevojën e miratimit të një ligji të posaçëm për mbrojtjen e pakicave gjuhësore krahinore.
“Zhvilluam një bisedë të hapur dhe tepër të ngrohtë, gjatë së cilës theksova nevojën e miratimit të një ligji të posaçëm për mbrojtjen e pakicave gjuhësore krahinore, veçanërisht për faktin se gjuha arbëreshe është një vlerë dhe pasuri e përbashkët e Shqipërisë dhe Italisë mike.
Një marrëdhënie e privilegjuar e Shqipërisë duhet të artikulohet gjithashtu me Rajonin e Siçilisë, si një mundësi e shkëlqyer për të forcuar lidhjet me vendin ku jeton edhe një pjesë e rëndësishme e komunitetit tonë të dashur arbëresh”.
Po kështu Meta i dhuroi zotit Miccichè një bust të Heroit tonë Kombëtar, Gjergj Kastriot Skënderbeut, simbol edhe të identitetit tonë të përbashkët europian.
