Mjeku infeksionist, Tritan Kalo mori sot dozën e tretë të vaksinës antikovid.
Kalo i bëri apel qytetarëve që të ndërgjegjësohen dhe të përdorin çdo mjet për t’u mbrojtur nga COVID.
Ai thekson se vetëndërgjegjësimi mbetet thelbi i ruajtjes së shëndetit të çdo individi dhe vetë shoqërisë në çdo kohë e rrethanë.
Sipas tij, “askush nuk duhet të hezitojë të marrë vaksinën”.
“Vaksinimi e ul shumë rrezikun e infektimit, të kalimit të formave të rënda të infeksionit apo të humbjeve të jetës prej tij në të gjitha grupmoshat e popullatës ku ato janë testuar, sidomos në individët me komorbozitete si dhe ata, që për arsye të profesionit janë më të ekspozuar ndaj kësaj “flame mbarëbotërore”. I renditur në “vijën e zjarrit” të përkujdesjes për të sëmurët me COVID-19, që me fillimin e Pandemisë dhe me rrezik maksimal të infektimit nga virusi Sars-Cov2/Covid-19, e shoh të domosdoshme të përdor çdo mjet mbrojtje ndaj tij përfshirë edhe vaksinën”, tha Kalo.
“Sot mora dozën e tretë të saj dhe ndihem për bukuri. Nëse jeni të bindur për efektshmërinë e vaksinimit mos hezitoni të përftoni prej dobiprurjes nga marrja e saj. Gojëligësia mundet t’ju ysht të hezitoni në bërjen e vaksinës, por unë personalisht e familjarisht jemi të vaksinuar”, tha Kalo.
