Berisha sqaroi edhe një herë nga “Foltorja” e Devollit se beteja që ka nisur nuk është personale. Përpara demokratëve të Bilishtit, Berisha tha se ishte betuar që të mos e pranonte Lulzim Bashën si kryetar të PD pas humbjes në 25 prill. Zoti Berisha tha se Basha i turpëroi demokratët dhe i uli kokën dhe i çoi nga humbja në humbje.
Ndërsa përjashtimin e tij me vendim të Bashës nga grupi parlamentar e quajti dhunim të forumeve të partisë dhe statutit të PD-së.
“Të thuash se unë po bëj betejë personale me Foltoren, është absurde dhe marrëzi. Foltorja dhe gjykata janë shumë larg njëra-tjetrës. Gjykata është në Paris, merret me shqyrtimin, Foltorja po merret me rindërtimin e demokracisë, pluralizimit dhe PD-së. Ka një moment të pamohueshëm këtu, ndonëse i betuar në mënyrë absolute se nuk do të pranoja kryetar në këtë mandat atë që na çoi nga humbja në humbje dhe na turpëroi, na uli kokën dhe do të gjeja mënyrën si do të nisja betejën, ky më krijoi të gjitha kushtet. Unë kisha deklaruar se do të kthehesha në skenën politike. Ky një ditë prej ditësh më përjashton në shkelje flagrante të statuti nga grupi parlamentar.
Ky ishte dhunim i forumeve të partisë, i statutit dhe parimeve të PD. Ky ishte pjesë e atij skenari dhe unë e dija, por për mua ajo nuk kishte ndonjë rëndësi kaq të madhe sepse nuk ishte ky që kishte firmosur, firmën e kishte vënë zotëria me të cilin unë shkova në gjykatë. Shkelmoi sovranitetin e forcës tonë politike. Pa ditur vendimin që do të merrte, këtë bisedë e kam bërë me atë dhe ka qenë 100% dakord me mua, një parti që pranon të pavërtetën për të vërtetë nuk duhet të ekzistojë zotëri i kam thënë dhe nuk ka këtu komente.
Ndaj dhe sigurisht më dha shkas që unë të mos pranoja dhunimin e forumeve të partisë, statutit, sovranitetit të partisë dhe mora këtë nismë të cilën ju e shndërruat në mrekullinë më të madhe shqiptare. Ai që po lufton në mënyrë personale për të mbrojtur veten nga dosjet e tij është njeriu i marrë peng nga Edvin Rama dhe nga shumë anë të tjera. Ne me penge s’kemi punë. Jemi të lirë. Dhe me idealet tona do të shndërrohemi në një opozitë vigane”, tha Berisha.
Berisha vazhdon të deklarojë se ekziston marrëveshje Rama-Basha dhe faktet gjithnjë e më shumë e tregojnë këtë. Zoti Berisha i përmendi sërish Bashës dosjen “Toyota Yaris” duke thënë se i ka këkruar të japë shpjegime.
“Çdo ditë po del gjithnjë e më shumë në pah, që kryetari është peng i marrë nga qeveria dhe të tjerë. Unë kurrë nuk do ta etiketoja kështu pa pasur fakte se ishte i tillë dhe faktet gjithnjë e më shumë po dëshmojnë këtë gjë. Nëse në Shqipëri është vendosur narko-shteti, për fat të keq kreu i opozitës me dosjet e tij të krimit është aksioner i këtij shteti. Në “Foltore” të ndryshme kam denoncuar dhe i kam kërkuar të japë shpjegime për dosjen “Toyota Yaris” dhe dosjen “Muzin”.
Garantoj se me radhë do dalin dhe dosje të tjera. Projekti i Emirateve në Durrës nuk do zhvillohet kurrë sa të jetë PD forca politike forca më e fuqishme e vendit. Për aferën e “Toyota Yaris” u dënua vetëm një njeri. Kjo do të thotë që Edi Rama ja mbylli dosjen peng kryetarit. Por dosja i kishte rrënjët në Belgjikë. Belgjika kishte nisur hetimet, të dosje nuk ja mbyllte dot këtij. Nëse Rama pengut i mbylli dosjen e Tiranës, atë nuk ja mbylli dot. Dua t’i kërkoj këtu që të japë dorëheqjen dhe mos fshihet. Edi Rama të ka mbajtur peng me dosjen në Shqipëri, por me dosjen në Belgjikë deri tani rezulton anëtar i organizatës kriminale”, tha Berisha.