Varianti Omicron përbënte rreth 73 për qind të rasteve të Covid-19 në SHBA në javën e kaluar, sipas të dhënave të Qendrave për Kontrollin dhe Parandalimin e Sëmundjeve (CDC) të publikuara të hënën.
Sipas mediave të huaja, përcjell Telegrafi, shifrat shënojnë një rritje të madhe nga vlerësimi prej rreth 12.6 për qind një javë më parë.
Autoritetet shëndetësore të SHBA-së kishin vlerësuar fillimisht se bëhej fjalë për rreth 3 për qind për atë javë, por e rishikuan numrin e tyre pas renditjes së mëtejshme.
Kështu, Omicron është tani lloji dominues në vend, duke e vendosur Delta në vendin e dytë. Delta së fundmi përbënte rreth një të katërtën e rasteve, sipas vlerësimeve të CDC.
Një valë e fortë me Delta goditi SHBA-në gjatë verës. Shtatori pa një rënie të numrit të infeksioneve të reja, por që nga tetori ato janë rritur sërish, me numrat që janë rritur veçanërisht ndjeshëm në ditët e fundit.
Më shumë se 800,000 njerëz kanë vdekur në SHBA në lidhje me infeksionet Covid-19 që nga fillimi i pandemisë.
Fushata e vaksinimit në vend pati një fillim të fortë, por ka shënuar ngadalësim në përparim kohët e fundit.
Sipas të dhënave, rreth 61.5 për qind e 330 milionë njerëzve të vendit janë vaksinuar me të dy dozat.
Shtëpia e Bardhë e ka quajtur deri më tani variantin Omicron një shkak shqetësimi, por tha se nuk është një arsye për panik.
