Për Lulzim Bashës, Sali Berisha nuk është asgjë më shumë përveç se ish-deputet i PD-së. Pas përjashtimit nga të gjitha strukturat, lideri demokrat tha sot se ish-kryeministri që sot hyri me forcë në parti është e kaluara, ish-deputet i PD-së dhe asgjë më shumë. “Një ish-deputet i PD-së që është futur me ndihmën e familjarëve me dhunë në selinë e PD-së” tha ai.
Lideri i PD-së vijoi më tej duke u ndaluar te protesta. “Dje pamë një “non grata” përpara kryeministrisë edhe një që pritet që të shpallet “non grata” që nuk kishte marrë as masat më të vogla të sigurisë sepse janë në sintoni me njëri tjetrin sepse i lidh halli personal” tha ai.
“Sot po merremi prapë me Sali Berishën që nga dëshpërimi i lëvizjes false personale, po zbrazet mbi dyert e PD-së i shoqëruar nga eksponentë të krimit, si Fatjon Dautaj, narko-trafikanti i kërkuar nga Britania e Madhe, njeriu që shkelmoi një nga dyert e dhomave të PD-së. E kërkojnë në Angli, por ja ku e kanë në selinë e PD-së, duke shkelmuar dyert e PD-së. Informacioni do u përcillet të gjitha përfaqësive relevante në Tiranë.
Hyrja e dhunshme në zyra vetëm ekspozon dëshpërimin e Sali Berishës, pasi e ka kuptuar se është një i vetëm i ndjekur nga një përzierje e çuditshme njerëzish që e kanë urryer dhe e urrejnë, por shpresojnë të kapin diçka prej tij dhe një pjesë demokratë të zhgënjyer, që duhet ti zhveshim nga iluzionet e Sali Berishës. PD ka mundësitë të mbrojë integritetin e institucionit të saj. Ndaj sot PD i kërkon prokurorisë të arrestojë Fatjon Dautajn, ta procedojë dhe të nisë procedimin me Britaninë e Madhe.
Sali Berisha me një grup familjarësh dhe banditësh vjen dhe thyen zyrat. Kjo është një fatkeqësi për demokratët. Por i siguroj demokratët që dëshpërimin e një njeriu të vetëm nuk do të lejoj të marrë peng aksionin tonë dhe ti zgjasë jetën një tjetri që pret të njëjtin fat si ky. Një i shpallur non grata, nuk do të lejoj që t’i zgjatet jeta një tjetri që pret të shpallet non grata, që është ulur në karrigen e kryeministrit” tha ai.