Një burrë i paralizuar me një palcë të dëmtuar kurrizore ka mundur të ecë sërish, falë një implanti të zhvilluar nga një ekip studiuesish zviceranë.
Sipas BBC, përcjell Telegrafi, kjo është hera e parë që dikush që ka një dëmtim të plotë të shtyllës kurrizore ka mundur të ecë lirshëm.
Madje, siç thuhet më tej, e njëjta teknologji ka përmirësuar shëndetin e një pacienti tjetër të paralizuar deri në atë masë sa ai ka mundur të bëhet baba.
Hulumtimi është publikuar në revistën Nature Medicine.
Siç thekson BBC, Michel Roccati u paralizua pas një aksidenti me motor pesë vjet më parë.
Palca e tij kurrizore ishte dëmtuar plotësisht – dhe ai nuk ka asnjë ndjenjë në këmbët e tij.
Por ai tani mund të ecë – për shkak të një implanti elektrik që i është ngjitur në mënyrë kirurgjikale në shtyllën kurrizore.
Dikush i lënduar nuk ka mundur të ecë kështu më parë.
Studiuesit theksojnë se nuk është një kurë për dëmtimin e shtyllës kurrizore dhe se teknologjia është ende shumë e ndërlikuar për t’u përdorur në jetën e përditshme, por megjithatë e përshëndesin atë si një hap të madh për përmirësimin e cilësisë së jetës.
Michel, gjatë një deklarimi për BBC, në laboratorin ku u krijua implanti, tha se teknologjia “është një dhuratë për mua”.
“Unë ngrihem në këmbë, eci ku të dua, mund të eci shkallëve – kjo është pothuajse një jetë normale”.
Por nuk ishte vetëm teknologjia që nxiti rimëkëmbjen e Michel.
I riu italian ka një vendosmëri të fortë.
Ai ka thënë që në momentin e aksidentit ishte i vendosur të bënte sa më shumë përparim.
“Kam boksuar, vrapuar dhe bëja stërvitje në palestër. Por pas aksidentit, nuk munda të bëja gjërat që më pëlqente të bëja, por nuk e lejova të më prishte humorin. Nuk e ndalova kurrë rehabilitimin tim. Doja për të zgjidhur këtë problem”.
Shpejtësia e shërimit të Michel-it mahniti neurokirurgen e cila futi implantin dhe elektrodat e lidhura me mjeshtëri në fibrat nervore individuale, Prof. Jocelyne Bloch nga Laboratoire de Neurothérapies et Neuromodulation – LNTM.
“Isha jashtëzakonisht e befasuar”, ka rrëfyer ajo. “Michel është absolutisht i jashtëzakonshëm. Ai duhet të jetë në gjendje ta përdorë këtë teknologji për të përparuar dhe për të qenë gjithnjë e më i mirë”.
