Ish-kryeministri, Sali Berisha, risolli në vëmendje goditjen e rrjetit të trafikantëve në një operacion antidrogë të zhvilluar njëherësh në Belgjikë, Spanjë, Itali, Gjermani, Kroaci dhe Holandë
Sipas tij, hetimi i bandave shqiptare ka nxjerrë zbuluar dhe ministra të narkoshtetit.
Berisha: Hetimi i fundit i kryer nga disa shtete si Itali, Belgjikë, Gjermani, Francë pas zbulimit të një aplikacioni që përdornin bandat shqiptare dhe qeveritarët shqiptarë për komunikime të fshehta themelet e narkoshtetit po dridhen si në një tërmet. Në ato përgjime ka emra ministrash, drejtorësh, prokurorësh, gjykatësish dhe shumë të tjerë. E mirëpres si një zhvillim jashtëzakonisht pozitiv në betejën kundër narkoshtetit, i bëj thirrje agjencive për një hetim të pavarur.
Për emrat tha se nuk është në dijeni.
Berisha: Emra ministrash të të gjitha niveleve. Nuk i kam emrat.
Gazetari: I ka SPAK këto të dhëna?
Berisha: Kush, SKAP-i?
Për mediat në oborrin e Kuvendit, Berisha kërkoi ndihmën e Antimafies italiane për të hetuar dhe aferën e incineratorëve.
Berisha: I bëj thirrje Antimafies italiane në një akt mbështetje dhe ndihmë kundër bashkëpunimit transadriatik të mafies të hetojë me gjithë potencialet e saj aferen e incineratorëve në Shqipëri në të cilën koka e Meduzës është Edi Rama por sekretar i Përgjithshëm i kësaj afere mafioze është Don Agaçi. Shqiptarët do të vlerësonin me shumë mirënjohje nëse Antimafia e heton dhe këtë çështje që është një nga më të dhimbshmet, më të
mëdhatë të korrupsionit por është thjesht një nënfish i aferës së portit të Durrësit që shkon minimumi 4 mld dollarë pronë publike në dispozicion të kompanisë offshore Rama-Brava.
