Sali Berisha e akuzon pasardhësin e tij në PD se ka qenë i përfshirë në aferën e inceneratorëve kur ishte kryetar i Bashkisë së Tiranës.
“Fillon ky tek plehrat dhe më vjen Bardhyl Bardhi, me thotë ky po na pengon. Ky nuk lejon që materialin e riciklueshëm ta marrim ne, por ka krijuar kompaninë e vetë më vonë. E thërras, si është kjo punë i them. Më thotë do bëj një model të Barcelonës, më mashtroi. Modeli i Barcelonës ishte modeli i xhepit. Ky nuk e bëri dot Sharrën minierë të tij se atë s’ja mbante, s’kishte guxim. Më mashtroi për groposjen. Ç’ka nuk e bëri kurrë”.
Por në takimet elektorale në zonën e ish-Kënetës dhe Shënvlash, mega aferën më të madhe ku sërish Ramën dhe Bashën e bën bashkëortak, cilëson projektin e Portit të Durrësit.
“E dëgjuat pardje këtu Bravën? I thoshte gazetarëve dhe gazetarëve se i përmendet emri për këtë aferë edhe kreut të qeverisë edhe mua. Po u përmendet se që të dy jeni të zhytur këmbë e krye në këtë aferë. U tha shqiptarëve se ai dha dorëheqjen nga kompania e Bravës. Tre muaj edhe pasi kishte njoftuar, ai vazhdonte punën sepse priste të shiste apartamentet në parandërtim në territorin që duan t’i grabisin Durrësit”.
Akuzon 2 kandidatët për kryetarë të Bashkisë së Durrësit, që ka përballë në garën e 6 Marsit kandidati i “Shtëpisë së Lirisë”, si figura të korruptuara.
Emirjana Sakon e PS e lidh si me aferën e inceneratorëve dhe e bën përgjegjëse për viktimat e tërmetit të Nëntorit 2019, pasi me firmën e saj kishte dhënë garanci për sigurinë e banesave pas tërmetit të mëparshëm, atij të Shtatorit të po atij viti.
Ndërsa kandidatin e PD, e sheh si kopjen e Lulzim Bashës.
“E keni parë si e ka gjetur kandidatin? Kopjen e tij. Luan Hoti është kopja e tij, sepse del që ky paska nga Edi Rama dhuratë monopol. Monopolin e porteve nga Saranda në Shëngjin. Po kjo njëherë është me ligj e ndaluar, qeveria nuk mund të japë monopol se monopol do të thotë korrupsion. Kjo do të thotë të paktën ti kesh çuar një valixhe me Euro Edi Ramës. Luani jo vetëm që e ka patur 4 vjet, por problemi i tij është se në Qershor duhet të përsërisë kontratën. Ai do mendojë vetëm për monopolin e tij se si do kënaqë Edi Ramën për të marrë monopolin”.
Berisha lajmëron për nisjen e protestave kombëtare kundër korrupsionit qeveritar.
