Presidenti Vladimir Putin tha se interesat e Rusisë sa i përket çështjeve të sigurisë nuk janë të negociueshme. Megjithatë pranoi se është i gatshëm për zgjidhje diplomatike për problemet më të vështira.
“E shohim se si po vështirësohen gjërat në arenën ndërkombëtare, rreziqet dhe sfidat që na kanë dalë përpara, si kërkesa për të dobësuar sistemet e armatimeve tona, ose aktiviteti ushtarak i bllokut të NATO-s”, tha Putin në një fjalim televiziv të publikuar të mërkurën nga Kremlini. “Në të njëjtën kohë, kërkesat e Rusisë për të ndërtuar sisteme të pandashme dhe të barabarta sigurie, për të mbrojtur të gjithë shtetet, nuk kanë marrë përgjigje”.
Putin shtoi: “Vendi ynë është gjithmonë i hapur për dialog të ndershëm dhe të drejtpërdrejtë, për gjetjen e zgjidhjeve diplomatike për problemet më të vështira. Por e përsëris, interesat e Rusisë dhe siguria e qytetarëve tanë nuk janë të negociueshme.
Prandaj ne do të vijojmë të zhvillojmë dhe të përmirësojmë ushtrinë dhe marinën tonë, për të siguruar që eficienca e tyre të rritet dhe që të jene të pajisur me teknologjinë më të fundit”.
Deklarata vjen në një kohë ku tensionet mes Rusisë dhe Perëndimit janë në pikën më të lartë, pas vendimit për të futur trupa në Ukrainë. Rusia miratoi marrëveshje bashkëpunimi me të ashtuquajturat Republika Popullore të Luhanskut dhe Donetskut, territore që në fakt janë pjesë e shtetit të Ukrainës.
Kievi pretendon se Putin ka futur tashmë mbi 10 mijë trupa në territorin e saj dhe frika për një pushtim të plotë mbetet e lartë. Si kundërpërgjigje e këtij veprimi, Britania e Madhe dhe Shtetet e Bashkuara të Amerikës vendosën sanksione të forta kundër bankave ruse dhe oligarkëve të lidhur me Putin, ndërsa Gjermania pezulloi procesin e certifikimit të gazsjellësit “Nord Stream 2”, që do të dërgojë gaz rus në vend.
