Lideri historik i demokratëve, Sali Berisha ka komentuar sërish dorëheqjen e Lulzim Bashës nga lidershipi i PD.
Për Berishën, “Basha ishte i shkarkuar nga Kuvendi historik i 11 dhjetorit, dhe nga referendum i 18 dhjetorit. Kanë votuar 4460 delegatë, dhe 44 mijë anëtarë, kjo është e vërteta e pandryshueshme. Jemi të vendosur të punojmë për bashkimin e Partisë Demokratike, me të gjithë ata të cilët mendojnë se vota e lirë duhet të na bashkojë, mund t’iu them se ka një mirëkuptim të gjerë gjatë këtyre ditëve”.
Berisha shtoi se “ka vetëm një grup parlamentar në PD, jo dy. Çdo deputet i PD eshte i thirrur të ketë realitetin parasysh, por nuk është se disa qëllime absurde të Bashës nuk krijuan anomal. Gjëja më imediate është që të normalizohet jeta e grupit parlamentar. Kam dijeni se po punohet me intensitet në këtë drejtim, dhe do të realizohet”.
Për sa i përket draftit të PD-së së përfaqësuar nga Enkelejd Alibeaj, që ndër të tjerat kërkonte edhe largimin e Berishës, lideri historik i PD-së komentoi se “për sa i përket fletushkës që lexoi zoti Alibeaj, në atë fletushkë Lulzim Basha shndërrohej në plaçkë tregu, por kjo nuk është normale”.
Berisha shtoi se “selia është e PD dhe nuk ka diskutim, jemi në proces e sipër të vendimeve që do merren, dhe PD do të bashkohet duke u shndërruar në një forcë politike që nuk ka pasur Shqipëria ndonjëherë”.
