Dje u përhap lajmi se miliarderi Roman Abramovic, pjesë e negociatave midis palës ukrainase dhe ruse për zgjidhjen e konfliktit, kishte pasur shenja të dukshme helmimi, së bashku me dy negociatorë të tjerë ukrainas, në bisedimet e para të ndodhura në bjelloruse, më 4-5 mars.
Sot ish-pronari i Chelsea duket se ka marrë veten dhe ndodhet aktualisht në bisedimet mes palëve në Stamboll.
Negociatorët, të paktën ata ukrainas, u këshilluan të marrin masa sigurie shtesë, për të shmangur incidente të tjera.
“Këshilloj këdo që do të marrë pjesë në negociatat me Federatën Ruse të mos hanë dhe të mos pinë asgjë. Mundësisht të shmangin edhe prekjet e sipërfaqeve të ndryshme”, deklaroi ministri i Jashtëm ukrainas Dmytro Kuleba.
Ndërkohë, sipas disa burimesh të zbardhura nga BBC, sulmi ndaj Abramovic dhe negociatorëve të tjerë mund të jetë nisur nga një grup ekstremist rus, që kundërshton mundësinë e paqes mes vendeve.
Por ka edhe nga ata, veçanërisht në ambientet amerikane, që mendojnë se nuk ka pasur një helmim të mirëfilltë, dhe që shkaku mund të jetë natyral ose edhe i stisur.
