Disa automjete ushtarake të forcave turke e kanë kaluar kufirin me Sirinë të dielën dhe kanë vazhduar në drejtim të jugperëndimit së bashku me forcat amerikane për t’i filluar patrullat e përbashkëta dhe për ta formuar një zonë sigurie përgjatë rajonit kufitar, i cili kontrollohet kryesisht nga forcat kurde.
Automjetet ushtarake me flamuj turq u bashkuan me automjetet me flamuj amerikanë rreth 15 kilometra në lindje të qytetit kufitar turk, Akcakale, i cili ndodhet afër qytetit sirian, Tel Abyad. Në qiell janë parë dy helikopterë ushtarakë, të cilët e përcillnin lëvizjen e kolonës së automjeteve.
Pas negociatave intensive, Turqia dhe Shtetet e Bashkuara e kanë ndërtuar një qendër të operacioneve të përbashkëta, por deri tash nuk kanë arritur marrëveshje për gjerësinë e zonës së sigurisë dhe për strukturën komanduese për veprimet e forcave.
“Gjeografia jonë është përparësi, por jemi në disavantazh sa i përket imigrimit dhe terrorit”, tha ministri i brendshëm turk, Suleyman Soylu.
Falë përkrahjes së Shteteve të Bashkuara, Forcat Demokratike Siriane e kanë marrë kontrollin në një pjesë të madhe të Sirisë verilindore nga militantët e të ashtuquajturit Shtet Islamik, shkruan “Reuters”.
