Moska po tërheq ushtarët nga rrethinat e Harkivit, qyteti i dytë më i madh i Ukrainës ku po humbet terren.
Sipas New York Times, e cila citon funksionarë ukrainas dhe perëndimorë, bëhet fjalë tani për goditjen e dytë të rëndë për Moskën pas tërheqjes nga Kievi muajin e kaluar.
Sipas zyrtarëve, Kremlini me gjasë do të ridërgojë trupat në juglindje, ku po forcon praninë e tij në Izium, qytet që ndodhet dy orë larg Kievit, i marrë nën kontroll rus një muaj më parë, shumë pranë Donbasit.
Ushtria ukrainase ndërkohë ka bërë të ditur se forcat ruse kanë organizuar sulme në më shumë qendra në Ukrainën lindore ndërsa kërkojnë të zgjerojnë kontrollin atje, por jo të gjithë kanë patur sukses.
Shtabi qendror i forcave të armatosura ukrainase, në raportin e tij të përditshëm ka pohuar se ushtria ruse ka vijuar sulme me artileri e avionë mbi portin e rrethuar të Mariupolit duke u përqendruar tek blloku i luftëtarëve ukrainas në fabrikën e çelikut Azovstal.
Në lindje janë marrë në shënjestër një zonë pranë Donetskut.
Sipas zyrtarëve ukrainas, ushtria ruse mund të intensifikojë madje bombardimet mbi Mariupol pas evakuimit të civilëve atje. Bombardimi i fabrikës së çelikut madje është bërë edhe përmes bombarduesve strategjikë rusë, sipas zyrtarëve ukrainas.
