Një gjykatë e Stambollit ka dënuar ish-futbollistin turk Sezer Ozturk me 14 vjet e shtatë muaj burg për vrasjen e një burri pas një mosmarrëveshjeje me makinë.
Vendimi e dënon ish-lojtarin me origjinë gjermane dhe ish-shpresën e madhe të futbollit turk me 12 vjet e gjashtë muaj burg për “vrasje me paramendim pas provokimit të pajustifikuar” dhe dy vjet e një muaj të tjerë burg për armëmbajtje pa leje dhe shkaktim të lëndim trupor.
I akuzuari u deklarua i pafajshëm, duke pretenduar se vrasjen e ka kryer për vetëmbrojtje, por prokuroria beson se ish-lojtari, tashmë sipërmarrës i kateringut, pas një debati në trafik ka ndjekur një tjetër person dhe e ka qëlluar duke ikur pastaj.
Ozturk luajti dy sezone në Bayer Leverkusen dhe një tjetër në Nurenberg në Gjermani.
Pastaj ai ka veshur edhe fanellën e klubeve si Fenerbahce, Besiktas dhe Basaksehir.
Ai luajti për të gjitha grupmoshat e të rinjve të Turqisë, por nuk debutoi për kombëtaren A.
