Samiti i Bashkimit Evropian me vendet e Ballkanit Perëndimor do të mbahet më 23 qershor në Bruksel, ndërsa në këtë samit do të diskutohet edhe për perspektivën evropiane të këtyre vendeve.
Megjithëse ditëve të fundit është raportuar se në këtë samit do të diskutohet edhe çështja e liberalizmit të vizave dhe ishte shprehur optimizëm për këtë proces, në draft konkluzat që ka parë Telegrafi çështja e vizave nuk përmendet fare.
Kosova është i shteti i vetëm në Evropë që ende nuk gëzon të drejtën e lëvizjes së lirë, pavarësisht se Komisioni Evropian dy herë ka theksuar se Kosova i ka përmbushur kriteret për liberalizimin e vizave.
Në konkluzat që pritet të dalin nga ky samit, e në të cilat Telegrafi i ka parë bëhet thirrje për sundim të ligjit dhe progres në dialogun Kosovë-Serbi, por që nuk përmendet diçka rreth liberalizimit të vizave.
Në këto konkluzione Bashkimi Evropian shpreh zotimin e plotë për perspektivën evropiane të Ballkanit Perëndimor, ndërkaq bën thirrje për rëndësinë e reformave dhe sundimin e ligjit, sidomos në çështjet që kanë të bëjnë me pavarësinë e gjyqësorit dhe luftimin e korrupsionit.
Në këto konluzione po ashtu përmendet çështja e dialogut Kosovë-Serbi, ndërkaq thekson urgjencën për përparimin në dialog, me qëllim të normalizimit të marrëdhënieve.
Përveç këtyre përmenden edhe çështje tjera për shtetet në rajon, mirëpo nuk përmendet çështja e liberalizimit të vizave.
Megjithatë deri në kohën kur pritet të nisë samiti i BE-së me vendet e Ballkanit Perëndimor konkluzat mund të pësojnë ndryshime.
Holanda dhe Franca konsiderohen dy vendet skeptike sa i përket çështjes së liberalizimit.
Në prag të mbajtjes së Samitit të BE-së në Bruksel, këshilltarja lokale e Bashkimit Evropian, Kati Schneeberger i ka shkruar letër presidentit të Francës, Emmanuel Macron, duke i kërkuar liberalizimin e vizave për Kosovën.
Po ashtu, ajo i ka dërguar edhe peticionin me nënshkrimet që kërkojnë një gjë të tillë.
Optimizëm për këtë proces ditë më parë ka dhënë edhe i dërguari i BE-së për dialogun Kosovë-Serbi, Miroslav Lajçak.
Ai kishte thënë se Kosovës i duhej dhënë liberalizimi i vizave shumë kohë më parë.
“Nuk ka asnjë dyshim që Kosova i ka plotësuar të gjitha kushtet për të hequr sistemin e vizave dhe problemi qëndron sërish tek mungesa e konsensusit. Por mund të them që kjo problematikë po ngrihet mes vendeve anëtare shumë më shpesh, gjatë takimeve të organeve të ndryshme evropiane ndaj mendoj se është afër. Nuk guxoj të them një datë por ajo po vjen dhe këtë e them me siguri të plotë”, citohet të ketë thënë Lajçak.
E për liberalizimin e vizave, përmes një letre dërguar Presidentit të Këshillit Evropian, presidenti i Sllovenisë, Borut Pahor, i ka kërkuar Bashkimit Evropian që në samitin e 23 qershorit ta heq regjimin e vizave për qytetarët e Kosovës.
Presidenti slloven kërkesën e ka bërë përmes një letre dërguar Presidentit të Këshillit Evropian, Charles Michel.
