Kryetari i partisë Demokratike Lulzim Basha ka mbërritur në qytetin e Shkodrës.
Fillimisht ai zhvilloi një takim në zyrën e kryebashkiakes Ademi ndërsa më pas ka planifikuar edhe disa takime të tjera me strukturat e PD në Shkodër, por edhe në Vaun e Dejës.
Ndërkohë në një deklaratë për mediat ai tha se: “Nuk ndahet politika nga krimi pa proces zgjedhor. Duhet të tregojmë rrugën e daljes nga kjo krizë për të gjithë shqiptarët.
Nuk ka zgjidhje nga jashtë, zgjidhja vjen nga brenda vendit, pa bërë ‘viktimën’. Sot vendi ka shpresë, Shkodra një ngabastionet e shpresës”.
“Kriza është prodhuar nga bashkëpunimi i politikës me krimin dhe ajo mund të zgjidhet duke e ndarë atë nga krimi. Proces zgjedhor pa garancinë se qytetarët nuk do të dhunohen, pa një transformim të thellë, nuk mund të ketë. Do të vazhdojmë betejën deri në fund për të çliruar Shqipërinë nga politika e lidhur me krimin. Ky është qëllim që bashkon gjithë shqiptarët e ndershëm. As Rama e as organizata e tij kriminale nuk kanë as përgjigje dhe as zgjidhje për Valdrin Pjetrin, Kajmakun, apo Babanin.
Rruga e zgjidhjes së kësaj krize të jetë sa më e mundshme dhe e shkurtër. Kjo situatë e mundimshme ekonomike që është produkt i krizës ekonomike nuk mund të zgjasë dhe triumfi mbi të keqen nuk do të vonojë. Shkodra ka qenë dhe është simbol i pathyeshmërisë para të keqes. Ska zgjidhje nga jashtë. Zgjidhja do të vijë nga brenda. Jashtë kemi pasur miq, por kjo krizë nuk zgjidhet duke bërë viktimë apo duke parë nga qielli. Zgjidhet duke marrë në dorë fatet tona”, tha Basha më tej.
