Kuvendi i Maqedonisë së Veriut nuk ka caktuar ende një datë për shqyrtimin e propozimit francez. Krye-parlamentari, Talat Xhaferi, mbajti një takim me koordinatorët e grupeve parlamentare për të diskutuar për këtë temë.
Ai njoftoi se seanca plenare për kuadrin negociator do të thirret vetëm pas debatit për miratimin e buxhetit të rishikuar për vitin 2022, që zgjat pesë ditë.
Gjithashtu Xhaferi konfirmoi se propozimi francez për nisjen e negociatave të anëtarësimit me Bashkimin Europian do të shkojë direkt në kuvend për debat dhe votim pa u kthyer në qeveri, siç kërkon VMRO-DPMNE-ja opozitare.
Kjo forcë politike, e cila prej ditësh proteston kundër planit Macron, thekson se dosja e dërguar në kuvend është e paplotë dhe kërkon dokumentin e plote nga kabineti i drejtuar nga Dimitar Kovaçevski.
LSDM-ja në pushtet u përgjigj duke theksuar se propozimi është publikuar I plotë nga qeveria në uebsajtin e saj dhe se është bërë transparencë lidhur me këtë çështje.
