Vendet kandidate për anëtarësim në BE, Shqipëria dhe Maqedonia e Veriut kanë marrë dritën jeshile nga të gjitha 27 vendet anëtare për të filluar negociatat e anëtarësimit.
Pas njoftimit të së hënës, krerët e të dy vendeve u ftuan në Bruksel të martën për të diskutuar atë që kryeministri çek Petr Fiala e përshkroi si “hapat e ardhshëm në rrugën e tyre drejt BE”.
“Me këtë, ne mund të kalojmë në fazën tjetër të procesit të pranimit për të dy vendet,” tha Komisioneri Evropian për Fqinjësinë dhe Zgjerimin, Olivér Várhelyi për Euronews. “Kjo do të thotë se ne mund të fillojmë tani negociatat e pranimit ndërsa flasim.”
Përveç Maqedonisë së Veriut dhe Shqipërisë, katër vende të tjera të Ballkanit Perëndimor janë në faza të ndryshme të procesit të anëtarësimit. Serbia dhe Mali i Zi kanë hapur negociatat e anëtarësimit dhe ndërkohë kanë mbyllur disa kapituj tematikë nga 35 gjithsej.
Bosnja dhe Kosova konsiderohen si vende kandidate potenciale, pasi i kanë nënshkruar Marrëveshjet e tyre të Stabilizim Asociimit, por negociatat që atëherë kanë ngecur për të dyja.
Ukrainës dhe Moldavisë iu dha statusi i kandidatit në sesionin më të fundit të Këshillit Evropian në Bruksel, më 23 qershor.
Përveç kësaj, Turqia është gjithashtu një kandidate, e cila ka paraqitur kërkesën e saj për t’u anëtarësuar në Komunitetin Ekonomik Evropian, paraardhësi i BE-së, që në vitin 1987, por shanset e saj për t’u bërë një anëtare e plotë konsiderohen pothuajse inekzistente.
“Ndjesia ime tani është se ka shumë më tepër hapje për të mirëpritur anëtarë të rinj të BE-së, por sigurisht që këta anëtarë të rinj do të duhet t’i bindin anëtarët aktualë se janë të gatshëm jo vetëm të respektojnë, por të përmbushin të gjitha kërkesat,” tha Várhelyi.
“Nëse Evropa dëshiron të jetojë në siguri, prosperitet dhe stabilitet, ajo duhet ta ketë fqinjin e saj, Ballkanin Perëndimor, të integruar plotësisht. Kjo luftë në Evropë, agresioni i Rusisë kundër Ukrainës, e ka dëshmuar rëndësinë e kësaj,” shtoi ai.
Zhvillimi historik erdhi pasi Maqedonia e Veriut votoi për të pranuar të ashtuquajturin propozim francez si një mjet për t’i dhënë fund vetos nga fqinji i saj, Bullgaria, e cila kishte bllokuar fillimin e bisedimeve të pranimit që nga viti 2020.
© SYRI.net
