Policia braziliane ka arrestuar një diplomat gjerman me dyshimin për vrasjen e bashkëshortit të tij në shtëpinë e tyre në një lagje prestigjioze të Rio de Zhaneiros. Dyshohet se ai ka tentuar të mbulojë krimin pas vrasjes, raporton CBS news.
Konsulli gjerman Uwe Herbert Hahn u tha autoriteteve se burri i tij, shtetasi belg Walter Henri Maximilien Biot, u sëmur të premten në mbrëmje, u rrëzua dhe goditi kokën dhe vdiq, tha policia.
Megjithatë, një autopsi dhe analiza mjeko-ligjore e banesës së çiftit në lagjen Ipanema tregoi se Biot ishte rrahur rëndë. Në trup janë konstatuar mavijosje të shkaktuara nga shkelja, si dhe lezione.
Hahn nuk do të ketë imunitet diplomatik
Llogaria e komisariatit në Instagram postoi fotografi të asaj që dukej si njolla gjaku në dysheme dhe mobilje në banesën e çiftit. Mediat braziliane raportojnë se Hahn nuk do të ketë imunitet diplomatik duke pasur parasysh natyrën e krimit. Policia nuk iu përgjigj menjëherë një kërkese për koment.
Raportet e mediave lokale thanë se Hahn, i cili ishte i martuar me Biot për 20 vjet, u përpoq të pastronte vendin e ngjarjes përpara se të arrinte policia.
Ambasada gjermane nuk iu përgjigj menjëherë një kërkese për informacion. Por ambasada dhe konsullata në Rio de Zhaneiro thonë se janë në kontakt me autoritetet braziliane që po hetojnë rastin, tha një burim në Zyrën e Jashtme Federale Gjermane.
