Një butik i vogël rrobash me emrin “House of Zana” (Shtëpia e Zanës), ka fituar një betejë të gjatë ligjore me gjigantin e modës “Zara”.
Amber Kotrri, bashkëshorti i të cilës është shqiptar, ka luftuar për rreth një vit në seanca gjyqësore me kompaninë e njohur botërore, për shkak se kjo e fundit e paditi shtetasen angleze për emrin e zgjedhur për butikun.
Sipas Zara-s, emri i butikut do të hutonte blerësit pasi ishte i njëjtë dhe për këtë arsye, ata kërkonin ndryshimin e emrit ose mbylljen e dyqanit.
Por Amber nuk është dorëzuar dhe ka vendosur t’i shkojë kësaj çështjeje deri në fund duke korrur edhe një fitore e cila i ka dhënë shpresë të vazhdojë edhe më tej.
“House of Zana” sipas saj, është frymëzuar nga një krijesë mistike shqiptare siç është zana, pra emrat janë shumë të ndryshëm dhe kanë kuptime thellësisht të ndara nga njëra-tjetri.
Të njëjtën gjë kanë menduar edhe gjyqtarët e çështjes të cilës, kanë dalë në përfundimet se çdo lidhje midis dy markave do të ishte “shumë e parëndësishme” aq sa për të mbyllur një biznes.
Vetë Amber ka rrëfyer për BBC se marka është e lidhur ngushtë me Shqipërinë dhe se ka shpresa që kjo sfidë, të jetë e para që do t’i hapë edhe më shumë dyert drejt suksesit.
