Për qytetarët në Kosovë, mosdakordësimi dhe mosarritja e një marrëveshje mes kryeministrit Kurti e presidentit serb në Bruksel ishte e pritshme.
Ata kërkojnë nga ndërkombëtarët, presion të shtuar ndaj Aleksandër Vuçiç, duke theksuar se Serbia tashmë e ka humbur Kosovën dhe kjo nuk mund të zhbëhet.
E teksa vëmendja është përqendruar tek fjalimi i Vuçiç, njoftuar për të dielën mbrëma, qytetarët thonë se ky është plani i Beogradit, që të fitojë kohë e të shtyjë marrëveshjen me Kosovën.
Edhe pse një marrëveshje këtë javë në Bruksel nuk u arrit, përfaqësuesi i BE, Josep Borrell, tha se palët janë zotuar për vazhdim të bisedimeve, e ndoshta mund të rikthehen në tryezën e dialogut para 1 shtatorit.
Por deri atëherë, qytetarët shqiptarë e serbë, kryesisht në veri të Mitrovicës, i tremben një përshkallëzimi të tensioneve.
