Kryeministri Edi Rama ka dhënë një intervistë për të përditshmen britanike ‘The Telegraph’, ku mes të tjerave foli dhe për numrin e shtuar të emigrantëve shqiptarë që kërkojnë të kalojnë La Manshin në mënyrë ilegale, duke rrezikuar dhe jetën, për të shkuar në Mbretërinë e Bashkuar.
Kreu i qeverisë iu bën thirrje të rinjve që synojnë Britaninë që të mos shpenzojnë 20-30 mijë paund për rrugën e rrezikshme, por të qëndrojnë në Shqipërië dhe të investojnë në turizmin pasi do të kenë dhe mbështetjen e qeverisë.
“Së pari, do të doja t’u bëja thirrje të gjithëve që të mos ecin në atë rrugë sepse do të jetë gjithnjë e më e vështirë, do të bëhet gjithnjë e më e shtrenjtë dhe shumica do të dështojnë. Qeveria shqiptare do të sigurojë mbështetje financiare për të mbështetur plane të tilla mes shqetësimeve se numri i të rinjve shqiptarë që kërkojnë të kalojnë Kanalin po rritet. Mund të fitoni shumë më tepër para se sa mundeni nga një punë e zakonshme në MB, nëse nuk përfshiheni me rrjete kriminale që mund t’ju joshin me histori me më shumë të ardhura, por që përfundimisht të çojnë në ferr”, tha Rama.
Gazeta britanike më tej shkruan se shqiptarët përbëjnë deri në 60 për qind të mbërritjeve, 100 herë më shumë se numri i vitit të kaluar. Rreth 2,000 shqiptarë të tjerë thuhet se kanë mbërritur në Francën veriore dhe po jetojnë në kampe të improvizuara në Dunkirk dhe Calais përpara se të bëjnë udhëtimin përmes detit.
