Gjatë protestës së sotme të zhvilluar te Universiteti i Arteve, pedagogu i Universitetit Politeknik të Tiranës, Erison Karamani, ka mbajtur një fjalë e cila përhapi trishtim dhe revolt te pjesëmarrësit e shumtë.
Ai tha se në vend që të vazhdonte të qëndronte në Shqipëri duke studiuar dhe dhënë mësim me këto rroga qesharake, duhet të kishte marrë gomonen drejt Anglisë ose të ishte përfshirë me parti politike, që qeveria sot të “punonte” për të pastruar paratë e tij.
“Në vend që të ulesha e të studioja mjaftonte të futesha të një nga këto programet degjeneruese në televizone që të kisha karrierë e të më admironin, apo të merrja gomonen për në Angli që qeveria të punonte natë e ditë për mua që të pastronte lekët e mia, ose und të kisha marrë një tesër partie dhe t’i ofroja më shumë familjes time. Pikërisht ky është absurdi që është ulur këmbëkryq në këtë shoqëri”, është shprehur ai.
Më tej, tha se pedagogëve u kërkohet të botojnë artikuj në revista shkencore, që kushtojnë më shumë se paga mujore e një pedagogu.
“Më kërkojnë të botoj artikuj në revista shkencore që kushtojnë më shumë se rroga ime. Po ndërtojnë instalacion në kryeministri 4 milionë euro, ndërsa buxheti për kërkimin shkencor ishte vetëm 300 mijë euro. Ankohemi se nuk ka protesta, por kur dikush ngre zërin për të drejtat e tij të gjithë e kryqëzojnë. Një pedagog i mirëpaguar do të thotë rritje e cilësisë në mësimdhënie. Studentët më kanë shprehur se bojkoti jonë ndoshta i cenon ekonomikisht me kostot e jetesës dhe I kuptoj shumë mirë. I ftoj që ta shohin nga një pikëpamje më e madhe, I bëj thirrje të protestojnë dhe ata për kostot e jetesës por nuk mund të heqim dorë nga protesta jonë.”, vijoi më tej.
Prej shumë ditësh pedagogët janë hedhur në protesta të cilat ende nuk po konsiderohen nga qeveria Rama, por ata kanë paralajmëruar, që nëse nuk iu plotësohen kërkesat deri ditën e hënën do të bojkotojnë procesin mësimor pa afat. Nga ana tjetër pritet që me nisjen e vitit të ri shkollor në universitete atyre tu bashkohen edhe mijëra studentë.
