Në protestën e organizuar sot nga opozita nuk kanë munguar pankartat e shumta ku shigjetohet kryeministri Edi Rama.
Por një grup të rinjsh kanë zgjedhur të protestojnë me një mënyrë tepër të veçantë, duke marrë me vete në sheshin para kryeministrisë një gomone me flamurin e Mbretërisë së Bashkuar, si simbol i krizës së emigrantëve shqiptarë që kalojnë La Manshin për të mbërritur në Britaninë e Madhe.
Opozita ka akuzuar disa herë Ramën si përgjegjës për ikjen e shqiptarëve gjatë këtyre viteve. Sipas shifrave të Ministrisë së Brendshme Britanike, rreth 12 mijë shqiptarë kanë ikur me gomone në Angli këtë vit, një pjesë e madhe meshkuj të rinj.
Qeveria britanike ka vendosur të kalojë një ligj të veçantë për shqiptarët, të cilët do të kthehen menjëherë mbrapsht në Tiranë nëse kapen duke kaluar kufirin ilegalisht. Autoritetet dhe mediat britanike i kanë etiketuar shqiptarët si kontingjent krimi, çka ka sjellë reagimin e qeverisë shqiptare, por edhe njerëzve të thjesht që punojnë e jetojnë atje.
Të shtunën në Londër mijëra shqiptarë protestuan kundër etiketimeve negative ndaj shqiptarëve. Ndërsa Kryeministri Edi Rama i quajti “ulërima nga një çmendinë” fjalimet e qeveritarëve britanikë.
Sipas BBC, në vitin 2020, 50 emigrantë u larguan në Britani me gomone. Në vitin 2021, 800 emigrantë dhe në 2022, 12.000 emigrantë.
