Panamaja, Mauritania, Gjeorgjia dhe Eritrea janë katër shtete, të cilat kanë pothuajse të njëjtën numër popullsie sa Kroacia.
Të katra shtetet e sipërpërmendura shënojnë vetëm një pjesëmarrje në kupat e botës, mes të cilave së fundmi ishte Panamaja, e cila luajti në Rusi 2018, ku shkoi deri në fazën e grupeve.
Por, pjesëmarrja e Kroacisë në kupat e botës është një histori krejt ndryshe, pasi përfaqësuesja ballkanike ka arritur tre herë gjysmëfinalet, ndërsa katër vite më parë arriti deri në finale, ku humbi kundër Francës.
Kroacia arriti pavarësinë në vitin 1991, pas një lufte të përgjakshme ballkanike, ndërsa deri në vitin 1995 popullsia e saj ishte më pak se 4 milion.
Një ekip që ka bërë ndër vite historinë, e së fundmi këtë kupë bote, kur është një ndër katër më të mirave, teksa mundi në çerekfinale Brazilin, ku fitoi me penallti.
Por, përballë Kroacisë është një Argjentinë e frikshme me Lionel Messin në krye, me një popullsi prej 45 milion banorësh.
Por, si “lindi” Kroacia në futboll?
Federata kroate e Futbollit ka aplikuar për të qene pjesë e FIFA-s në vitin 1992, ndërsa u bë pjesë e saj një vit më vonë, në 1993-n.
Por, që nga pjesëmarrjet e para në kompeticione, nuk do të merrte shumë kohë që Kroacia të kthehej në një superfuqi. Vetëm 3 vjet pas anëtarësimit në FIFA, kroatët arritën çerekfinalet në Europianin e vitit 1996.
Më pas, dy vite më vonë, në kupën e botës Francë 1998, ata arritën të renditeshin të tretët. Në këtë periudhë ishte edhe gjenerata e parë e emrave të mëdhenj që shënjuan historinë e futbollit kroat si: Davor Suker, Robert Prosineçki dhe Zvonimir Boban.
Madje, Suker në vitin 1998 u cilësua edhe golashënuesi më i mirë i kompeticionit.
Ardhja e Zlatko Daliç si trajner i Kroacisë në 2017-n rezultoi vital për ekipin ballkanas. Ai grumbulloi pranë ekipit emra të mëdhenj si Luka Modriç, Ivan Rakitiç, Marcelo Brozoviç, apo edhe Ivan Perisiç dhe me ta arriti të performonte në nivele të larta.
Dhe falë frymës së grupit që Daliç injektoi mes lojtarëve, pritjet ndaj këtij ekipi u shpërblyen, ndërsa në këtë kupë bote ka arritur që të çojë në shtëpi një superfuqi si Brazili apo Belgjika.
Ndaj Argjentinës do të përsëritet historia e vitit të largët 1998, kur Kroacia e Stimac u përball me super-ekipin e Gabriel Batistutës apo Juan Sebastian Veron.
