Të dhënat e Bankës së Shqipërisë tregojnë se të ardhurat e shqiptarëve nga puna jashtë vendit për tremujorin e tretë kanë shkuar në vlerën 108.18 mln euro, duke u rritur me 30% krahasuar me tremujorin e tretë të vitit të kaluar.
Të ardhurat e shqiptarëve nga puna jashtë vendit po shënojnë nivele rekord për vitin 2022. Të ardhurat neto nga ky zë vetëm për tremujorët e deritanishëm kanë arritur në vlerën e 311 milionë eurove, një rritje me 93% krahasuar me të njëjtën periudhë të vitit të kaluar.
Pjesa më e madhe e rritjes ka ardhur sidomos gjatë tremujorit të dytë të vitit, kur të ardhurat neto nga puna jashtë vendit arritën vlerën e 112.6 milionë eurove, në rritje me 91% krahasuar me një vit më parë. Ndërkohë që tremujori i tretë krahasuar me tremujroin paraardhës ka pësuar ulje me 3.97% ose në vlerë absolute 4.47 milion euro.
Kjo kategori të ardhurash për Bilancin e Pagesave përfshin përfitime që vijnë si rezultat i kompensimit të punonjësve, të tilla si paga, shpërblimet dhe përfitime të tjera, të fituara nga individët jorezidentë në një ekonomi, për punën e kryer për rezidentët e kësaj ekonomie.
Po në këtë kategori punonjësish, përfshihen edhe punonjësit sezonalë apo ata që punësohen për një periudhë afatshkurtër, më pak se një vit, si dhe punëtorët kufitarë të cilët e kanë qendrën e interesit të tyre ekonomik në vendin e tyre të origjinës./SCAN intel
