Papa Françesku, në meshën e Krishtlindjes në Vatikan, tha se lutjet e tij janë për fëmijët, sidomos ata që jetojnë në zona konfliktesh.
“Mendoj mbi të gjithë për fëmijët e gëlltitur nga lufta, varfëria dhe padrejtësia”, theksoi Ati i Shenjtë, i cili hyri në kishë me një karrige me rrota.
Gjithsesi, Papa Françesku nuk përmendi konkretisht luftën mes Rusisë dhe Ukrainës gjatë meshës.
“Edhe në këtë Krishtlindje, njerëzimi i pangopur me para, pushtet dhe kënaqësi, nuk i lë vend, ashtu siç bëri Jezusi, më të vegjëlve”, shtoi Papa Françesku, në praninë e 7000 besimtarëve, ndërsa të tjerë e ndoqën meshën nga Sheshi Shën Pjetër nëpërmjet ekraneve gjigante.
“Pas 2000 viteve nga lindja e Krishtit, pas shumë Krishtlindjeve të festuara mes dhuratave, ka një rrezik: dimë shumë gjëra mbi këtë festë, por harrojmë domethënien e saj”, nënvizoi Ati i Shenjtë.
