Oligarkët më të pasur rusë kanë humbur pothuajse 95 miliardë dollarë këtë vit për shkak të sanksioneve të rrepta të vendosura nga vendet perëndimore për luftën në Ukrainë. Ata kanë humbur 330 milionë dollarë në ditë që kur Kremlini filloi pushtimin.
Roman Abramovich, ish-pronari i Chelsea FC, ishte humbësi më i madh, ndërsa pasuria e tij ra me 57% në 7.8 miliardë dollarë këtë vit, sipas Indeksit të Miliarderëve të Bloomberg.
Abramovich ishte një nga oligarkët e parë që iu nënshtrua sanksioneve të Mbretërisë së Bashkuar më 10 mars , pasi ministrat e akuzuan se kishte “lidhje të qarta” me regjimin e Putinit dhe se ishte në mesin e një grupi biznesmenësh të pasur rusë që kishin “gjak në duart e tyre”.
Pasuria e Gennady Timchenko, një investitor miliarder në energji dhe mik i ngushtë i Putinit, është ulur me 48% në 11.8 miliardë dollarë dhe Suleiman Kerimov, një tjetër prej aleatëve të presidentit rus, ka humbur 41%, duke rënë në 9 miliardë dollarë.
Qeveria e Mbretërisë së Bashkuar ka ngrirë më shumë se 18 miliardë paund asete që u përkasin oligarkëve dhe rusëve të tjerë, totali i parë zyrtar i zbuluar së fundmi. Sanksionet janë vendosur ndaj 1271 personave, duke përfshirë Abramovich dhe “Mbretin e Nikelit” Vladimir Potanin, personi i dytë më i pasur i Rusisë, sipas rishikimit vjetor të Zyrës së Zbatimit të Sanksioneve Financiare.
Sanksionet më të rënda të vendosura deri më tani, sipas qeverisë britanike, kanë rezultuar në ngrirjen e 18.4 miliardë paund të aseteve të lidhura me Rusinë, që janë pothuajse 6 miliardë paund më shumë se asetet e mbajtura nën të gjitha regjimet e tjera të sanksioneve në Mbretërinë e Bashkuar.
