12 ditë pas kontrolleve në Fushë Kuqe, forcat e policisë kanë zbarkuar në Surrel, në një tjetër banesë të të shumëkërkuarit Ervis Martinaj.
Kontrollet kanë qenë me kërkesë të SPAK, në kuadër të operacionit ‘Plumbi i Artë’ dhe janë zhvilluar gjatë pasdites së të shtunës.
Ndonëse nga ana e policisë nuk ka një reagim zyrtar lidhur me këtë operacion, burime bëjnë me dije se në banesën e Martinajt, forcat e policisë kanë sekuestruar vetëm dokumente dhe jo sende të paligjshme. Këto materiale do të dërgohen për ekzaminim.
Sakaq mësohet se në momentin që FNSH dhe RENEA ka ushtruar kontrolle, në banesën e të shumëkërkuarit nuk ka patur njeri.
Këto operacione në shtëpitë e Ervis Martinajt vijnë 7 muaj pasi ai u shpall në kërkim pas rrëfimeve të Nuredin Dumanit në kuadër të operacionit ‘Plumbi i Artë’.
Ndërkohë vetëm 4 muaj më parë, 40-vjeçari u denoncua i zhdukur nga familjarët e tij.
Kjo çështje po hetohet nga Prokuroria e Kurbinit, e cila shpresën më të madhe për zbulimin e fatit të të shumëkërkuarit e ka tek ish-polici i Operacionales, Jeton Lami.
Ky i fundit është dhe kontakti i fundit me Ervis Martinajn.
