Kreu i tifozëve “Dardanët”, Lulzim Berisha, ka kërkuar nga tifozët që do të ndjekin ndeshjen Kosova – Mali i Zi në stadiumin “Fadil Vokrri” të mos provokojnë ekipin dhe tifozët mysafirë, por vetëm të përkrahin Kosovën.

Ndeshja e vlefshme për Grupin A kualifikues për “Euro 2020” nis në orën 20:45. Tashmë shumë tifozë janë afër stadiumit në pritje për të hyrë brenda.

“Ne si tifozë ‘Dardanë’ jemi gati qysh para disa ditësh, sepse i përfundojmë shumë më herët përgatitjet. Tash fillojmë të hyjmë në tribuna. Ne jemi gati. Duhet të jemi të qetë, sipas informacioneve, kanë me qenë 150 tifozë nga Mali i Zi. Ne nuk duhet t’i bëjmë dëm shtetit, por ta përkrahim shtetin e lojtarët tanë në çdo aspekt”, ka thënë ai në një deklaratë për KTV-në.

Berisha është shprehur i bindur për fitore të Kosovës. Ka thënë se “tri pikët mbesin në Prishtinë, si zakonisht”.