Kryeministri britanik, Rishi Sunak, është zotuar të rrisë numrin e kthimeve të emigrantëve në Shqipëri.
Ai gjatë një interviste që shënon 100 ditët e tij të para në detyrë u shpreh se plani i tij për rishikimin e sistemit do të thotë se kërkesat për azil do të dëgjohen brenda disa “ditësh ose javësh”.
Sunak tha se përpjekjet për të “thyer ciklin” përfshinin një marrëveshje të re me Shqipërinë – që thuhet se është origjina e 30 për qind të emigrantëve të paligjshëm – dhe bashkëpunimi më i ngushtë me Francën.
Kryeministri britanik theksoi se niveli i migrimit të paligjshëm në MB nga Shqipëria është “qesharak” dhe ndau detaje të marrëveshjes së tij të re.
“Nëse vini këtu në mënyrë të paligjshme, duhet të ndaloheni shpejt dhe pastaj brenda disa ditësh apo javësh do të dëgjojmë pretendimin tuaj”.
Duke folur nga shtëpia e tij në Downing Street, Sunak tha se, ky është sistemi që nevojitet dhe sistemi që do të prezantoj.
“Por unë do të punoj me shqiptarët për të vendosur një marrëveshje të re që do të thotë për njerëzit që vijnë nga Shqipëria ilegalisht, ne do të jemi në gjendje t’i largojmë ata përsëri në Shqipëri dhe kjo tashmë po ndodh”.
Sipas tij, autoritetet britanike po i kthejnë në fluturime migrantët e paligjshëm nga Shqipëria dhe kjo do të rritet gjatë vitit.
Sunak theksoi legjislacionin e ri që ai po propozon për të forcuar sistemin.
“Shumë shpejt ne do të prezantojmë ligje të reja në Parlament, të cilat ofrojnë sistemin që shpjegova, sistemin që thotë se nëse vini këtu ilegalisht, nuk do të mund të qëndroni vërtet këtu”.
I pyetur nëse ideja e Ruandës do të ndodhë ndonjëherë pas sfidave gjyqësore, kryeministri u përgjigj: Po.
Kjo nuk është hera e parë që Sunak i jep Home Office një objektiv ambicioz imigracioni.
Në dhjetor ai tha se do të pastronte numrin e mbetur të azilit deri në fund të 2023.
Downing Street më vonë tha se premtimi lidhej me 92 mijë e 601 pretendime të bëra përpara hyrjes në fuqi të Aktit të Kombësisë dhe Kufijve në qershor.
