Kryeministri në detyrë i Kosovës, Ramush Haradinaj përmes një postimi në Facebook ka kujtuar heroin Adrian Krasniqi, për të cilin ka thënë se kombi që ka njerëz të tillë ka të ardhme të ndritur.

Adrian Krasniqi kishte rënë heroikisht më 16 tetor të vitit 1997.

“Ishe student i dalluar po aq sa dhe luftëtar. Gjithmonë besove në liri, për të cilën dhe u përjetësove 22 vite më parë, duke i prirë karvanit të dëshmorëve të Pejës. Ishe i dashur, i guximshëm me të gjitha tiparet e heroit. Ashtu do të mbetesh në kujtimin tonë dhe të brezave që vijnë Adrian Krasniqi, Hero dhe Gjeneral”, ka shkruar Haradinaj.

Tutje ai ka shtuar se ndihet krenar që ka pasur rastin ta njohë Krasniqin në ditët e lavdisë.

“Duke u përulur para veprës tende madhore, krenohem që u njohëm bashkë në ditët e lavdisë. Kombi që ka njerëz si ti, ka të ardhme të ndritur. Lavdi e përjetshme”, ka shkruar Haradinaj.