Kryetari i grupit parlamentar të Partisë Socialiste, Taulant Balla u shpreh sot se “thelbi i raportit të Komisionit të Venecias është se dekreti i Presidentit Ilir Meta për shtyrjen e zgjedhjeve u bë në mungesë të bazës ligjore”.
Balla iu përgjigj sot deklaratave të opozitës e cila pretendon në ndryshimin e draftit final të raportit të Komisionit të Venecias, mbi shkeljet e Presidentit Ilir Meta.
Balla tha se raporti e thotë qartë se “Presidenti nuk ka të drejtë të anulojë zgjedhjet”.
“Dua të rishpreh vlerësimin tonë më të madh për Komisionin e Venecias, një sistem i gjithëpranuar për ekspertizën më të lartë nga më shumë se 3 miliard banorë të globit, të cilët i ndihmon me opinione e analiza për respektimin e Kushtetutës së çdo vendi. Ju rikujtoj se opinionet e Komisionit të Venecias jepen mbi bazën e kërkesës së institucioneve që kanë tagrin për t’iu drejtuar këtij komisioni, Kuvendit të Shqipërisë”, tha Balla.
Duke risjell në vëmendje pyetjet që maxhoranca i ka drejtuar Komisionit të Venecias, Balla tha se “raporti thekson se Presidenti nuk ka të dejtë të anuloj zgjedhjet sepse nuk ia njeh as Kushtetuta dhe as ligji dhe ky është thelbi i referimit në seancën plenare se e drejta e zgjedhjeve nuk kufizohet veçse me ligj”.
“Presidenti nuk ka të drejtë të anulojë dekretin e datës së zgjedhjeve, pasi nuk ja njeh as ligji e as Kushtetua. Ky ka qenë thelbi i referimit në seancën plenare. Anulimi i zgjedhjeve nuk mund të bëhet pa bazë ligjore, pasi e drejtat e zgjedhjes nuk mund të kufizohet përveçse me ligj. Presidenti ka cenuar të drejtën e qytetarëve për të zgjedhur. S’ja pati asnjë fajin opozitës, as Komisioni, e as qeveria, që nuk hynë në zgjedhje”, tha balla.
Sipas tij “opinioni i Komisionit të Venecias shpërben si një udhërrëfyes për demokracinë”./ATSH/
