Jo vetëm nga toka dhe uji, por shqiptarët kanë tentuar që të ikin drejt Mbretërisë së Bashkuar edhe nga ajri. Mediat britanike kanë publikuar rastin e një avioni të vogël që ka transportuar 4 emigrantë të paligjshëm shqiptarë nga Belgjika në një aerodrom të vogël në Corby. Disa minuta më vonë aty ka shkuar një shofer që i ka dërguar në Asda.
Kanë qenë zyrtarët belgë ata që kanë dyshuar për avionin dhe kanë lajmëruar autoritetet britanike. Transponderi i avionit ka qenë i fikur dhe autoritetet e kanë pasur të vështirë që të ndjekin itenerarin e udhëtimit. Agjencia Kombëtare e Krimit në Britani e ka pikasur avionin në kohën që piloti e futi në një hangar në aerodromin Deenethorpe.
Shqiptarët, 3 meshkujt dhe 1 femër, u kapën në një parkim në Phoenix disa minuta më vonë. Edhe shoferi i makinës , Vijayakumar Sivakumar, 43 vjeç, që i transportonte ata nga aerodromi është arrestuar dhe akuzohet për dhënie ndihme për hyrjen e emigrantëve të paligjshëm në Mbretërinë e Bashkuar.
Piloti Richard Styles, 53 vjeç dhe Silvano Turchet kanë pranuar fajësinë në ngjarje. Por në ngjarje dyshohet se është përfshirë edhe një person tjetër i njohur si “Tim K”, i cili mendohet se është kreu i bandës. Emri i tij i vërtetë sipas mediave britanike është Kujtim Karanxha dhe ai është zhdukur ditën e fluturimit dhe që prej atëherë nuk është bërë i gjallë.
Sipas mediave, shoferi Sivakumar ka pasur 170 komunikime me Kujtim Karanxhën 50 ditë para arrestimit. Ai e kishte takuar Karanxhën në vitin 2020 me një taksi nga një kompani dhe pas këtij udhëtimi kishte bërë rregullisht udhëtime me të nga stacioni i Cholliers Wood deri në rrugën St James në Coydon.
Gjykata ka dëgjuar se Sivakumar kishte përdorur llogarinë e tij bankare për të transferuar disa shuma të mëdha parash ndaj të afërmve të Karanxhës pasi ky i fundit nuk ka pasur llogari të veten.
Po ashtu ai ka marrë para cash nga Karanxha ndërsa ishte në një qendër emigrantësh në Gatwick. Pas arrestimit, në celularin e 43-vjeçarit u zbuluan foto të ndryshme të disa pronave në Londër.
Ndërkohë në Nëntor të vitit 2021 atij i kishte ardhur një mesazh nga Tim K: Më fal, nuk e mora sepse policia po shikonte. Sipas gjykatësit, më 23 Mars të vitit të kaluar Sivakumar kishte marrë pilotin Styles dhe Karanxhën dhe i kishte çuar në Deenethorpe.
Atë natë, Styles shkoi në Belgjikë ndërsa Sivakumar u kthye në Londër me Karanxhën. Mëngjesin e ditës tjetër sërish së bashku shkuan në Northamtonshire. Rreth orës 12:00 të drekës ai shkoi në aerodrom dhe mori 4 shqiptarët. Në celular mori një mesazh ku thuhej: Phoenix Parkway, Corby, England”.
Sivakumar ka mohuar që të jetë pjesë e bandës. Por gjykata dëgjoi se ai edhe më herët ishte përpjekur që të fuste nga Franca në Britani disa shtetas nga Sri Lanka në vitin 2008.
Por avokati i tij është shprehur se ai nuk e kishte idenë që emigrantët që po transportonte ishin ilegalë. Avokati tha se klienti i tij ishte ‘lënë në baltë’ nga Karanxha dhe ishte ‘mashtruar’.
