Ministrja e Shtetit për Marrëdhëniet me Parlamentin, Elisa Spiropali ka reaguar lidhur me vendimin e Këshillit Europian për çeljen e negociatave me Shqipërinë dhe Maqedoninë e Veriut ku tha se nuk është një vendim fatal dhe nuk ka vend për dëshpërim.
Ajo vlerësoi Kancelaren e Gjermanisë Merkel, “e cila udhëhoqi personalisht frontin pro Shqipërisë dhe Maqedonisë, siguroi se Gjermania do insistojë të bëhet më e mira në raport me dy vendet ballkanike”.
Spiropali nuk la pa vlerësuar as Kryeministrin italian dhe Kancelaren në detyrë të Austrisë, Bierlein të cilët shprehën mbështetjen e tyre të qartë pro hapjes së negociatave me Shqipërinë dhe Maqedoninë e Veriut.
Spiropali thotë se, “reagimi i fortë i Departamentit Amerikan të Shtetit shprehu zhgënjimin mbi këtë vendim të padrejtë duke provuar kështu se Amerika do vazhdojë të jetë gjithmonë aleatja jonë strategjike për të zbrapsur cilëndo forcë që do i duket se me këtë rast u bë deti kos dhe do mundohet të përfitojë”.
“Prekëse të shohësh sa shumë mbështetës në BE dhe jashtë saj ka sot Shqipëria që është më pranë se kurrë kapërcimit të keqkuptimeve historike me Europën. E në gjithë këtë solidaritet mbareuropian, pse jo dhe mbarëbotëror, nuk ka si të mos të vijë keq për një grusht shqiptarësh të papërgjegjshëm si Berisha, Basha, ca lakenj mediatikë dhe ca gënjeshtarë patologjikë të pandershëm dhe të paturpshëm që falenderojnë Macron dhe sulmojnë Komisionin Europian për mbështetjen, duke fyer dhe lënduar në këtë mënyrë pa asnjë përgjegjshmëri dhe asnjë drojë inteligjencën dhe ndjeshmërinë patriotike të çdo shqiptari”, – u shpreh Spiropali.
Ministrja siguron se, “ne do vazhdojmë të bëjmë detyrat tona dhe nuk do të ndalemi derisa ta shohim Shqipërinë të çliruar nga këta të pafe e të paatdhe, dhe sigurisht do ta realizojmë ëndrrën kombëtare të shqiptarëve për t’u kthyer në familjen tonë natyrale, Europën”./ATSH/
