Marek Koźmiński, ish-futbollist i Kombëtares së Polonisë dhe ish-zëvendëspresident i Federatës, ka folur për situatën në të cilën ndodhet ekipi para përballjes me Shqipërinë më 27 mars, në ndeshjen e parë Eliminatore të Kampionatit Europian.
Ai ka nxjerr në pah veçanërisht problemet me të cilat është duke u përballur Polonia me ardhjen e trajnerit të ri, portugezit Fernando Santos. Fillimisht ai kritikoi listën me lojtarët e grumbulluar, ku kritikat janë përqendruar te mungesa e veteranit Grzegorz Krychowiak. “Ndoshta ai është më i ngadaltë se dikur, por me problemet aktuale të dëmtimeve, patjetër që do t’i vinte në ndihmë kombëtares. Unë e kuptoj deri diku vendimin e Santos, por në anën tjetër më duket se Krychowiak po paguan problemet që po kalon kombëtarja gjatë kohëve të fundit. Më vjen keq për të sepse është një futbollit dhe një person i mirë.
Kamil Glik është i dëmtuar. Jakub Kiwior kaloi në një klub të madh si Arsenali, por nuk po luan. Jan Bednarek nuk ka bërë paraqitje të mira në ndeshjet e fundit. Gjithashtu edhe Bereszyński nuk po luan rregullisht”, u shpreh ish-futbollisti i Kombëtares polake.
Më tej, ai kritikoi edhe drejtuesit e federatës për zgjedhjen e stafit të Santos, në të cilin nuk ka asnjë ndihmës nga Polonia. Por për Marek Koźmińskin ndoshta problemi më i madh në Kombëtaren polake mund të ketë lindur që në Botërorin e Katarit, për të cilat foli më herët portieri Łukasz Skorupski që tregoi detaje nga brenda dhomës së zhveshjeve. “Łukasz tha të vërtetën, por ato që ndodhin në dhomën e zhveshjeve mbesin aty”.
Portieri Skorupski ka folur për ndarjen e shpërblimeve për paraqitjen në Botërorin e Katarit. Lojtarëve iu premtua një shumë e madhe nga kryeministri nëse do të kalohej grupi, objektiv i arritur më pas. Megjithatë, portieri zbuloi se ka pasur debate të ashpra me lojtarët dhe disa prej tyre nuk kanë folur më me njëri-tjetrin.
“Unë mendoj se këto përplasje brenda grupit do të ndikojnë. Grupi do shumë kohë të krijohet, por mund te shkatërrohet brenda dy minutave”, është shprehur për mediat polake ish-futbollisti, Marek Koźmiński.
