Përveç datës së zgjedhjeve, liderët politik në takimin me presidentin Stevo Pendarovski, nuk janë marr vesh për asgjë tjetër konkrete.
Kodi Zgjedhor, Regjistrimi i Popullsisë dhe Ligji për Prokurorinë Publike do të presin ditë me të mira. Kryeministri Zoran Zaev thotë se deri në zgjedhje ka kohë të mjaftueshme për përfshirjen e rekomandimeve të OSBE-ODIHR-së.
Lideri i opozitës, Hristijan Mickoski thotë se modeli zgjedhor do të diskutohet pas zgjedhjeve të 12 prillit 2020.
Kreu i BDI-së, Ali Ahmeti thotë se rëndësi ka protokolli i NATO-s dhe Ligji për Mbrojtje, ndërsa para regjistrimit rëndësi ka data e zgjedhjeve.
Lideri i opozitës shqiptare, Ziadin Sela thotë se zgjedhjet nuk e pengojnë regjistrimin e popullsisë.
Kreu i Lëvizjes Besa, Bilall Kasami parashikon që regjistrimi i popullsisë do të bëhet nga Qeveria e re, ndërsa kreu i PDSH-së, Menduh Thaçi vlerëson se nuk mund të ketë regjistrim në kohë të zgjedhjeve. Mbi propozim-Ligjin për Prokurorinë Publike, pas takimit që Zaev kishte me partnerët e koalicionit deklaroi se opozitës i është ofruar propozimi i prokurorit për ndjekjen e korrupsionit të lartë, duke kërkuar që Kuvendi të miratojë Ligjin për shërbim në Prokurori që të mund prokurorëve special t’i paguhen rrogat të cilat akoma nuk i kanë marrë.
