Kryetari i Partisë Republikane, Fatmir Mediu i ftuar në një studio televizive tha sot se opozita duhet të dalë urgjentisht me një produkt për Reformën Zgjedhore.
“Ajo që më intereson më shumë është produkti. Është një tallje me procesin e reformës zgjedhore. Është detyrë e opozitës, në radhë të parë, që të kuptojë që ky proces duhet të mbarojë. Ne duhet ta bëjmë të mundshëm sa më parë”, tha Mediu.
Sipas kryetarit të PR-së, aleat me Partinë Demokratike, ai nuk e ka kompleks me kë ulet në tryezë.
“Nuk është e rëndësishmja ulja në tryezë, por të kuptosh se çfarë do. Unë nuk e kam kompleksin se me kë po ulem. Unë nuk e di çfarë kanë thënë Basha apo Kryemadhi. Unë them që urgjentisht, opozita shqiptare duhet të dalë me një produkt”, shtoi ai.
I ftuar në një studio televizive, edhe Sekretari për Çështjet ligjore në PD, Ivi Kaso u pyet për qëndrimin e opozitës në lidhje me Reformën Zgjedhore.
“Reforma zgjedhore thotë Bundestagu duhet bërë me pjesëmarrjen e gjithë faktorëve politik. Mazhoranca në pushtet, tentoi që me anë të një drafti të njëanshëm qe e ka miratuar me vetëm votat e deputetëve të mazhorancës ta paraqesë si reformë e bërë partnerëve. Këtë draft Bundestagu e ka konsideruar të pamjaftueshëm”, tha Kaso.
Sipas tij, klasa politike duhet të ulet dhe duhet të punojë me një draft konsensual. “Nëse ka një draft të njëanshëm që do të paraqitet nesër, do të thotë që mazhoranca në pushtet po bën të kundërtën e asaj që ka artikuluar ndërkombëtarët dhe atë çfarë presin ndërkombëtarët prej nesh”, theksoi ai./ATSH/
