Shkruar nga Pamfleti
Fushatë e gjelbër me pemë e drogë, kultivuar nën përkujdesjen dhe mburojën e policisë e krye bashkiakëve, që me të ardhurat nga pjesa e fitimit të saj, të mbushin “hambarin” e votave sipas “planit” të paracaktuar nga Babloku
E diela në Malësinë e Madhe kishte dy realitete: Kryeministri Edi Rama me krye bashkiakun Tonin Marinaj po mbillnin pemë në qendër të Koplikut, ndërsa në të njëjtën kohë, 3 skuadra policie po korrnin dhe digjnin drogë në kodrat rrotull.
Kryeministri Rama e di, që në këtë zonë të lënë prej tij si “çiflig” i Tomë Doshit, mbillet drogë pa frikë e pa pengesë; ndërsa krye bashkiaku Marinaj e di se ku mbillet, sa parcela mbillen, cilët janë kultivuesit, përpunuesit, përfituesit dhe trafikuesit e saj.
Edhe në Kuçovë, Krujë, Burrel, Bulqizë, Dibër, Përmet, Tepelenë, Mallakastër, Berat, Skrapar dhe në malësitë e Elbasanit, Ersekës e Pogradecit, këto ditë janë zbuluar parcela të shumta me drogë, të mbjella në sy të zyrtarëve të bashkive, të pyjores e policive zonale.
Pemët që mbillen me bujë, prej Bablokut, deputetëve, drejtuesve politikë të qarqeve e kandidatëve të PS, u duhen për propagandë mjedisore, si “gjethe” për të mbuluar betonin e kullave, pallateve, resorteve e pedonaleve.
Ndërsa mbjellja dhe trafikimi i drogës në çdo territor bashkie, madje edhe në magazina me energji elektrike, u duhet si mbështetje financiare për të blerë vota, ku fitimi ndahet mes palëve kultivues-kupolë pushteti.
Kryetarët e Bashkive, njësive administrative, kryepleqtë dhe drejtuesit e policisë në rrethe, kanë evidenca sa hektarë janë mbjellë me drogë nëpër kodra e male, cilët grupe, familje e individë që i kanë mbjellë, kur do ta mbledhin prodhimin e sa haraç kanë dhënë për zgjedhjet.
Pra, për pushtetin kemi një fushatë zgjedhore të gjelbër, gjatë të cilës udhëheqja e partisë po mbjellë pemë me kamera e tallava tru-shpëlarëse të popullit, ndërsa grupet “prapavija” financuese të kandidatëve, mbjellin droge në zonat kodrinore.
P.sh., sipas denoncimeve që kanë bërë banorët edhe në media, rekord për mbjellje droge me 179 parcela, është territori i Bashkisë Kuçovë, ku mburojë është krye bashkiaku Kreshnik Hajdari e oligarku Pëllumb Salillari, nëpërmjet vëllait Avdulla Salillari, këshilltar bashkiak në Dimal.
Por droga në këto parcela nuk asgjësohet, sepse me bekimin nga qendra e policisë së shtetit, po e mbron vetë shefi aktual i Komisariatit të Kuçovës, Ermir Gërxhani, ish-shef Komisariati në Përmet në vitin 2017, i përjashtuar e dënuar si kultivues e trafikues droge.
Si në Kuçovë, edhe në krejt bashkitë e tjera, parcelat e drogës mbillen e kultivohen nën përkujdesjen dhe mburojën e policisë e krye bashkiakëve, që me të ardhurat nga pjesa e fitimit të saj, të mbushin “hambarin” e votave sipas “planit” të paracaktuar nga Babloku./Pamfleti
