Guvernatori i Bankës së Shqipërisë, Gent Sejko renditi faktorët, që sipas tij e justifikojnë kursin e këmbimit, ku euro po shënon rekordin e saj historik sa i takon uljes së vlerës së saj. Guvernatori theksoi se investimet e huaja, të ardhurat nga turizmi, por edhe remitancat janë faktorët kryesore.
Gjatë prezantimit të raportit të Këshillit Mbikëqyrës të Bankës së Shqipërisë, Sejko tha se BSH ka vendosur të mbajë të pandryshuar normanë bazë të interesit në nivelin e 3%. Po ashtu Sejko tha se “e pandryshuar ka mbetur edhe norma e interesit të kredisë njëditore, në nivelin 4.00% dhe normën e interesit të depozitës njëditore, në nivelin 2.00%”.
“Lidhur me kursin e këmbimit BSH disa herë ka sqaruar dhe sot po japim komentin tonë. Kursi i këmbimi ka qenë në forcim prej një periudhe të gjatë. Forcimi i kursit këtë vit është edhe më i fortë. Kjo vjen për disa faktorë. Faktorët zyrtare dhe fondamentale e justifikojnë kursin e këmbimit. Të dhënat e bilancit të pagesave tregojnë një rritje të konsiderueshme në investimet e huaja direkt në krahasim me vitin e kaluar, një rritje të konsiderueshme të ardhurat nga turizmi, pra rritjet e eksperteve në total dhe remitancat kanë ardhur në rritje. Këto kanë bërë që oferta e euros në treg të jetë e konsiderueshme. Ne kemi monitoruar tregun dhe kemi vënë re që sjellja e tregut ka reflektuar kursin e këmbimit në mënyrë normale, pra nuk kemi oshilacione”, sqaroi Sejko.
Sejko po ashtu sqaroi edhe rastet kur BSH mund të ndërhyrje në kurs. Sipas tij, BSH e ka të përcaktuar me ligj dhe rregullore kur ndërhyn për kurs.
“BSH ka ndërhyrje në vitin 2018 në tregun e kursit të këmbimit, pasi të gjitha kriteret që unë përmenda në atë vit plotësoheshin. Ne ishin në një situatë deflacioniste. Sot jemi në një situatë të ndryshme. Ne ndërhyjmë për rezervë, por nuk quhet ndërhyrje për kursin e këmbimit. BSH publikon kalendarin e ndërhyrjeve, ndërhymë për të shmangur spekulimet dhe për të mbrojtur inflacionin. Të gjitha këto kritere nuk plotësohen në këtë rast”, sqaroi Guvernatori i Bankës së Shqipërisë.
